13 حوزه‌یران / یۆنیۆ (گوڵان میدیا)- له‌ رۆژانی رابردوودا چه‌ندین تۆمه‌تبار له‌لایه‌ن هێزه‌كانی به‌رێوه‌به‌رایه‌تی ئاسایشی گه‌رمیانه‌وه‌ به‌ مادده‌ی هۆشبه‌ره‌وه‌ ده‌ستگیركران و ڕووبه‌ڕووی‌ دادگا كرانه‌وه‌ و به‌پێی‌ ماده‌ی‌ 14ی‌ ماده‌ی‌ هۆشبه‌ر، 6 كه‌س له‌و تۆمه‌تبارانه‌ به‌ 7 ساڵ و یه‌كێكیشیان به‌ 6 مانگ زیندانی‌ حوكم دران.

لێپرسراوی‌ راگه‌یاندنی‌ ئاسایشی‌ گه‌رمیان، مولازم عوسمان عه‌بدولكه‌ریم، به‌ ئاژانسی‌ هه‌واڵی‌ په‌یامنێری‌ راگه‌یاند؛له‌ رۆژانی(26/5/2013)و (11/6/2013) پاش ئه‌وه‌ی هه‌موو به‌ڵگه‌كان خرانه‌ به‌رده‌م دادوه‌ری لێكۆڵینه‌وه‌ی تاوانه‌كانی كه‌ركووك/ گه‌رمیان و تۆمه‌تباره‌كان له‌ به‌رده‌م دادوه‌ری لێكۆڵینه‌وه‌دا دانیان به‌ تاوانه‌كه‌یاندا نا، كه‌ مادده‌ی هۆشبه‌ریان به‌كارهێناوه‌ و بازرگانییان پێوه‌ كردووه‌، له‌لایه‌ن دادگای ناوبراوه‌وه‌ شه‌ش كه‌س له‌ تۆمه‌تباره‌كان به‌ پێی یاسای(14)ی مادده‌ هۆشبه‌ره‌كان 7 ساڵ سزای زیندانی دراون و تۆمه‌تبارێكیش ماوه‌ی 6 مانگ حوكمی زیندانی دراوه‌.
مولازم عوسمان ئاماژه‌شیدا، به‌ هۆی ئه‌وه‌ی كه‌ به‌ڵگه‌ی ته‌واو و پێویست بۆ هه‌ر 3 تۆمه‌تبار (ش غ ع) و (ئا ع ع) و (س ع م) نه‌بووه‌، له‌لایه‌ن دادگای تاوانه‌كانی كه‌ركووك/ گه‌رمیان بڕیاری ئازادكردنیان دراوه‌