سەرۆكی هەرێمی كوردستان پێشوازی لە بالیۆزی نوێی ژاپۆن لە عێراق دەكات
لە دیدارێكدا سەرەتا بالیۆزی نوێی ژاپۆن خۆشحاڵیی خۆی بۆ ئەو دیدارە دەربڕی و دەستخۆشی لە سەرۆك بارزانی كرد بەهۆی ئەو سەقامگیری و بووژانەوەی لە هەرێمی كوردستان هاتووەتە ئاراوە بە جۆرێك كە زەمینەی وەبەرهێنانی بیانی و هاتنی سەرمایەگوزارە ژاپۆنییەكان بۆ هەرێمی كوردستان زۆر خۆش بووە. هەروەها باسی خاڵە هاوبەشەكانی هەردوو گەلی ژاپۆن و كوردستانی كرد كە هەر دووكیان قۆناغی سەختی شەڕ و كارەساتیان تێپەڕاندووە و گوتی: كارەساتی هەڵەبجەیش هیچی لە هیرۆشیما و ناكازاكی كەمتر نییە بەڵام ژاپۆنییەكان بەردەوامبوون لە بنیاتنانی ئاییندەیەكی گەشەسەندوو و گەلی كوردیش دەتوانێ دواڕۆژێكی گەش بۆ خۆی بنیات بنێت.
لای خۆیەوە سەرۆك بارزانی وێڕای بەخێرهێنانی بالیۆزی تازەی ژاپۆن ئاماژەی بە ڕۆڵ و پێگەی گەلی ژاپۆن دا لە هاوكێشە ئابووری و دەولییەكان و بە گەلێكی مەزنی وەسف كرد. لەبارەی خەبات و تێكۆشانی گەلی كوردیش سەرۆك بارزانی گوتی: گەلی كورد گەلێكی زیندووە و ویستی بۆ پێشكەوتن و ئاشتی هەیە و من شانازی بەوە دەكەم كە ئەندامێكی ئەم گەلەم چونكە لەدوای ڕاپەڕینی 1991 گەلی كورد بە ڕۆحێكی مرۆڤدۆستانە مامەڵەی لەگەڵ ئەو سەربازانە كرد كە ڕۆژانێك دەستیان لە ئەنفال و كیمیابارانی گەلی كوردستان هەبووە. گەلی كوردستان هیچ كات بە دوای تۆڵەی كوێرانە نەبووە.
بارودۆخی سیاسی ناوچەكە و پەیوەندییەكانی هەرێم و بەغدا تەوەرێكی دیكەی گفتوگۆكان بوو و، بالیۆزی ژاپۆن دەستخۆشی لە هەنگاوەكانی سەرۆك بارزانی و سەركردایەتیی سیاسیی كوردستان كرد بۆ هەوڵەكانیان لەپێناو سەقامگیری و چارەكردنی كێشەكان و هاتنی مالكیشی بۆ هەولێر بە بابەتێكی ئیجابی لە قەڵەم دا. هەروەها بالیۆزی ژاپۆن باسی باری گوزەرانی ئەو ئاوارانەی كرد كە لە سووریاوە پەنایان بۆ هەرێمی كوردستان هێناوە و سەرۆك بارزانیش هیوای خواست كۆمەڵگەی نێودەوڵەتی چیدی لە بەرانبەر باری گوزەرانی ئاوارەكانی سووریا لە هەرێمی كوردستان كەمترخەم نەبێت.
