6 حوزه‌یران / یۆنیۆ (گوڵان میدیا)- سه‌رۆكى لیستی یه‌كگرتووى ئیسلامى له‌ په‌رله‌مانى عێراق پێی وایه‌ سه‌ردانه‌كه‌ى نووری مالیكى سه‌رۆك وه‌زیران بۆ هه‌رێمى كوردستان به‌مه‌به‌ستى چاوپێكه‌وتنى سه‌رۆكى هه‌رێم، ئه‌رێنیه‌، به‌ڵام زۆر دره‌نگه‌ بۆ ئه‌م سه‌ردانه‌.
نه‌جیب عه‌بدوڵڵا باڵه‌ته‌یى رایگه‌یاند ئه‌و سه‌ردانه‌ى سه‌رۆك وه‌زیران نوورى مالیكى به‌ته‌مایه‌ ئه‌نجامى بدات بۆ هه‌ولێر بۆ كۆبوونه‌وه‌ له‌گه‌ڵ ئه‌نجومه‌نى وه‌زیران و چاوپێكه‌وتنى به‌ سه‌رۆكى هه‌رێم هه‌نگاوێكى ئه‌رێنیه‌ و به‌ئاراسته‌یه‌كى ڕاست ده‌ڕوات بۆ چاره‌سه‌ركردنى كێشه‌كان، به‌ڵام ئێسته‌ زۆر دره‌نگه‌ بۆ ئه‌م كاره‌، وه‌ك ڕوونه‌ ئه‌و دواكه‌وتنه‌ ئه‌وه‌ ده‌گه‌یه‌نێ هه‌ستكردن به‌ به‌رپرسیارییه‌تى له‌كن مالیكی لاوازه‌.
عه‌بدوڵڵا زیاتر روونی كردووه‌ته‌وه‌ كێشه‌ و ئاڵۆزییه‌كان و ئه‌و قه‌یرانانه‌ى عێراق تێى كه‌وتووه‌ ته‌نها به‌ چاوپێكه‌وتن و كۆبوونه‌وه‌ى به‌رپرسه‌ سیاسییه‌كان چاره‌سه‌ر نابێت، به‌ڵكو پێویستى به‌كارى جیدى هه‌یه‌ و به‌دڵنیاییه‌وه‌ زۆربه‌ى پرسه‌ هه‌ڵواسراوه‌كان ده‌چێته‌وه‌ نێو خولى داهاتووى په‌رله‌مان.
جێی باسه‌ عه‌لى موسه‌وى به‌رپرسى ڕاگه‌یاندنى سه‌رۆك وه‌زیران نوورى مالیكى رایگه‌یاندووه‌ كه‌ دانیشتنى داهاتووی ئه‌نجومه‌نی وه‌زیرانی عێراق له‌ هه‌ولێر ده‌بێت.

-bas