3 حوزه‌یران / یۆنیۆ (گوڵان میدیا)- رۆژی یەكشەممە هاوسەرۆكی پارتی ئاشتی و دیموكراسی سەلاحەدین دەمیرتاش لە شاری دیاربەكر لە گفتوگۆیەك لە گەڵ ژمارەیەك رۆژنامەنووسدا باسی رووداوەكانی مەیدانی تەقسیمی ئەستەنبۆڵی كردووە و گوتوویەتی: ئارمانجی مەهەپە و جەهەپە لە درێژەدان بە خۆپیشاندانانە لە باربردنی قۆناغی چارەسەری پرسی كوردە.

لەمبارەیەوە ماڵپەڕی خەبەری كوردی بڵاویكردۆتەوە كە هاوسەرۆكی بەدەپە سەلاحەدین دەمیرتاش سەرەڕای پشتگیریكردن لە خۆپیشاندانی هێمنانە بۆ پاراستنی سەوزایەتییەكان هاوكات ئاماژەی بەوە كردووە كە خۆپیشاندانەكانی مەیدانی تەقسیم لە ئارمانجی راستەقینەی خۆیان دوور كەوتوونەتەوە و خراونەتە خزمەتی ئەجەندای جەهەپە و مەهەپەیەوە.

ناوبراو لە بەشێكی دیكەی وتەكانیدا جەختی لە سەر ئەوە كردووەتەوە كە جەهەپە و مەهەپە نە بۆ پاراستنی دار و سەوزایەتی دەستیان بە خۆپیشاندان كردووە بەڵكو بۆ لە بار بردنی قۆناغی چارەسەری پرسی كورد دەستیان بەم خۆپیشاندان و نائارامییانە كردووە.