پەیامی سەرۆكی كوردستان بە بۆنەی ڕۆژی جیهانی كرێكاران
بەناوی خودای بەخشندە و میهرەبان
بە بۆنەی ڕۆژی جیهانی كرێكارانەوە پیرۆزباییەكی گەرم لە هەموو كرێكارانی جیهان بە گشتی و كرێكارانی كوردستان بە تایبەتی دەكەم. ئەو ڕۆژەی بووەتە هێمایەكی مێژوویی بۆ بەرگریكردن لە كرێكاران و ڕووبەڕووبوونەوەی چەوساندنەوەی ئەو توێژە كاریگەرەی نێو كۆمەڵگە.
بەشی زۆری ئەركی ئاوەدانكردنەوە و پێشڤەچوونی وڵات بەر كرێكارەكان كەوتووە. ماندووبوون و فیداكاریی ئەوانە وا دەكات چینوتوێژەكانی دیكەی كۆمەڵگە لە ئاسوودەییدا بژین هەر بۆیەشە ئەركی سەر شانی هەموو لایەكمانە پێزانینمان بۆ ئەو ئازیزانە هەبێت و پشتیوانی مافەكانیان بین.
هێشتا دۆخی ژیانی كرێكاران نەگەییشتووەتە ئاستی پێویست. هێشتا لە زۆر شوێنی جیهاندا چەوساندنەوە و پشتگوێخستنیان بەردەوامە. هەرچەندە ئێمەی كوردستانی خاوەنی كولتوورێكی دەوڵەمەندین بۆ ڕێزگرتن لە پێگە و ماندووبوونی كرێكاران بەڵام پێویستە پارلەمان و حكوومەت بە دەركردنی یاسا و بڕیار و ڕێنمایی نوێ خزمەتی زیاتری كرێكار بكەن و، سەندیكاكان و ڕێكخراوەكانی كۆمەڵگەی مەدەنییش لە هەوڵی بەردەوامدابن بۆ چەسپاندنی داواكاریی كرێكاران و باشتركردنی گوزەرانیان و لە هەمووی گرنگتر دابینكردنی بیمە و سەلامەتی پیشەییان. جێگەی خۆیەتی لەم بۆنەیەدا داوا لە گشت لایەنە پەیوەندیدارەكان و هاووڵاتییە خۆشەویستەكان بكەم كە پاڵپشتی ماف و سەلامەتیی ئەو كرێكارە بیانییانە بن كە لە هەرێمی كوردستاندا كار دەكەن.
بەو هیوایەی وڵاتمان بگاتە قۆناغێك كە دوور بێت لە چەوساندنەوە و نادادپەروەری و مسۆگەربوونی هەموو ماف و داواكارییەكی كرێكاران.
مسعود بارزانی
سەرۆكی هەرێمی كوردستان
