دوای ئەوەی بە فەرمی لە لایەن سەرۆكایەتی ئەنجوومەنی هەرێمی كوردستان لە كۆبونەوەی ژمارە 2ی 10ی شوباتی 2013 و بە نوسراوی فەرمی لە رۆژیی 4ی ئادار كە ئاڕاستەی دەزگا پەیوەندارەكان كراوە، بوردومانكردنی رۆژی24-4-1974 و راپەڕینی 24-4-1982 قەڵادزێ كرایە رۆژی شەهیدی زانكۆیی، دوێنێ لە گشت زانكۆكانی كوردستان بەتایبەت لە كۆلێژەكانی زانكۆی سەڵاحەددین رۆژی شەهیدی زانكۆیی بە بایەخەوە زیندوو دەكرێتەوە. د. ئەحمەد دزەیی سەرۆكی زانكۆی سەڵاحەددین رایگەیاند: جگە لەوەی لە كۆلێژەكان رۆژی 24ی4 رۆژی شەهیدی زانكۆیی بەرز رادەگیرێت، ئەوا مەراسیمێكی ناوەندی لەسەنتەری رۆشنبیری و كۆمەڵایەتی زانكۆی سەڵاحەددین بە بەشداری بەرپرسانی خوێندنی باڵاو ئەنجومەنی كۆلێژەكان و مامۆستایان و قوتابیان بەڕێوەدەچێت كە تێیدا چەندین چاڵاكی هەمە جۆر ئەنجام دەدرێت لە شێوەی وتار خوێندنەوەو كردنەوەی پێشانگاو نمایشی بەرنامەی دیكۆمێنتاری و خوێندنەوەی پارچە شیعری لەلایەن شاعیرانەوە.
جێی ئاماژەپێدانە لە كاتژمێر(9،45) سەر لەبەیانی رۆژی 24-4-1974 زیاتر لە 4تا 6 فڕۆكەی جەنگی لە جۆری سیخۆی Sukhoiدروستكراوی رووسی بە بۆمبی جۆری ناپاڵمی 500ی كیلۆگرامی دروستكراوی هیندستان بە چەكی قەدەغە كراوی نێودەوڵەتی بۆ یەكەمین جار لە زانكۆ و شاری قەڵادزێی مەڵبەندی شۆڕشی كوردستان تاقیكردەوە، لە ئاكامدا 132 هاووڵاتی لە قوتابی و خەڵكی بێ گوناهی ئەو شارەو زانكۆی سلێمانی ئەوكاتە شەهیدكردو زیاتر 350 كەسیش بریندار بوون.