هەڤاڵی بەڕێز فەرهاد محەمەد، سەرنووسەری گۆڤاری گوڵان
هەڤاڵان، سكرتێری نووسین و تەواوی ستافی نووسین و هونەریی لە گۆڤاری (گوڵان)ـی ئازیز

بەبۆنەی بیستەمین ساڵڕۆژی گۆڤاری (گوڵان)ـەوە گەرمترین پیرۆزباییتان لێدەكەین و دەستی ئەفراندنی یەكەیەكەتان دەگوشین و بە سوپاس و پێزانینی زۆرەوە دەڕوانینە ماندووبوون و بەرهەمی بە پێزتان كە لە گۆڕەپانی رۆژنامەگەریی كوردستانیدا شوێنی شایستەی خۆی هەیە.

ئومێدەوارین ئەو گوڵانەی كە بیست ساڵ لەمەوبەر وەكوو ئەزموونێكی نوێ یەكەم ژمارەی دەرچووەو لەم ماوەیەدا رووداوی گرنگی تۆمار و شی كردۆتەوە، بەردەوام بێ و بەرهەمی ئێوەیش رووی لە هەڵكشانی زیاتر بێ.

هەڤاڵان بەر لە بیست ساڵ دەرچواندنی گۆڤاری ( گوڵان) بڕیار و كارێكی بوێرانەی سیاسی و پیشەیی بوو. لەو سەروبەندەدا بوو كە رۆژنامەگەریی لەگەڵ یەكەمین حوكمڕانێتی خۆییدا مامەڵە بكات و گوڵان بە گوتارێكی رەخنەگرانەوە هاتە مەیدان و مەسافەیەكی وەكوو یەكی لەنێوان خۆی و تەواوی ژیانی سیاسی و ئیداری هەرێمی كوردستاندا هێشتەوەو رۆڵی بەرچاوی گێڕا لە بەرچاو رۆشنكردنەوەی حكومەت و خەڵكدا.

ئێستاش پاشی بیست ساڵ و دوای كەڵەكەبوونی ئەزموونی زۆری پیشەیی و سیاسیتان چاوەڕوانیمان لەم گۆڤارە ئازیزە هەر ئەوەیە كە درێژە بەو رۆڵەی خۆی بدات و بە شیكردنەوەی زانستی بابەتیانەو راستگۆ هاوكارو پشتیوانی هەنگاوەكانی چاكسازی سیاسی و كۆمەڵایەتی و گەشەی ئابووری و یەكڕیزی ناوماڵی كوردستانیی بێت لە بەرامبەر ئەو پڕكێشییە زۆرانەی رووبەڕووی گەلی كوردستان و دەستكەوتەكانی بۆتەوە.

جارێكی دیكە بیست ساڵەی گۆڤاری گوڵانی ئازیز لە ئێوەو ئێمەو خوێنەرانتان پیرۆز بێت.

مەكتەبی سیاسی
پارتی دیموكراتی كوردستان