30ی‌ ئازار/ مارس 2013 (گوڵان میدیا)- به‌ بۆنه‌ی هاتنه‌وه‌ی جه‌ژنی قیامه‌ی حه‌زره‌تی مه‌سیح (سڵاوی خوای لێ بێت)، پیرۆزباییه‌كی گه‌رم ئاراسته‌ی سه‌رجه‌م خوشك و برا مه‌سیحیه‌كان له‌ هه‌رێمى كوردستان و عیراق و جیهان به‌ گشتی ده‌كه‌ین، به‌ تایبه‌ت ئه‌و خوشك و برا مه‌سیحیانه‌ی به ‌هۆى مه‌ترسى و هه‌ڕه‌شه‌ و تیرۆره‌وه‌؛ ڕوویان له‌ هه‌رێمی كوردستان كردووه‌ بۆ ئه‌وه‌ى له‌ سایه‌ی سه‌قامگیرى و پێكه‌وه‌ژیانی برایانه‌ به‌ ئارامی له‌ كوردستاندا ژیان به ‌سه‌ر ببه‌ن، هیوادارین خوشك و برا مه‌سیحیه‌كان به‌ خۆشی و ئارامی جه‌ژنه‌كانیان بكه‌نه‌وه.

مه‌سیحییه‌كانى هه‌رێمى كوردستان له‌ دێرزه‌مانه‌وه‌ له‌گه‌ڵ موسڵمان و پێكهاته‌ ئایینییه‌كانی دیكه‌ى كوردستان به‌ برایه‌تی و به‌ ڕێز و خۆشه‌ویستییه‌وه‌ له‌گه‌ڵ یه‌كتر ژیاون و له‌ خۆشی و ناخۆشی و قوربانیدان بۆ هێنانه‌دیی ئازادی و ژیانێكی به‌خته‌وه‌ر به‌شدار بوونه‌، هه‌ر بۆیه‌شه‌ بنه‌ماى لێبورده‌یی و یه‌كترقبووڵكردن و برایه‌تی؛ بووه‌ته‌ ڕوویه‌كى پرشنگدارى هه‌رێمى كوردستان و سه‌رنجى كۆمه‌ڵگاى نێوده‌وڵه‌تى بۆ خۆى ڕاكێشاوه‌.

جارێكی دیكه‌ جه‌ژنی قیامه‌ له‌ هه‌موو خوشك و برایانی مه‌سیحی پیرۆز بێت و هه‌ر له‌ خۆشی و شادیدا بن.



سه‌رۆكایه‌تى ئه‌نجومه‌نی وه‌زیرانی هه‌رێمی كوردستان

30ى ئادارى 2013