رەنگە چاڤەرێبوون نەخوشترین دەم بیت ئەگەر چەند خۆلەک ژی بن ، چ چاڤەرێبوونا کەسەکی ، تشتەکی ، یان ھیڤی یەکێ بیت . مرۆڤ بەری بچیتە جھێ ژڤانی ب رێک و پێکی خۆ بەرھەڤ دکەت داکو ب شانازی و سەربلندی بگەھیتە مەبەستا خۆ ، ئەگەر چاڤەرێبوونا کوڕی بۆ دلدارا خۆبیت یان بەرۆڤاژی ، ب جلکێن رێک و پێک و بێھنەکا خۆش و ب دیاری ڤە دێ ل جھێ ژڤانی بەرھەڤ بیت , داکۆ بگەھیتە مەبەستا خۆ . گەلێ کورد ژی سەرێ سەد سالایە چاڤەرێ سەرخۆبوونا کوردستانێ ، رێکا گەھشتنا جھێ ژڤانی کو سنوورێن کوردستانێ نە ل ستری و ئاستەنگان پاقژ کریە و پێشمەرگەھێن کوردستانێ ب باوەریەکا پۆلایین پارێزڤانێن ھەردەم ھشیارن , جھێ ژڤانی کۆ ئاخا کوردستانێ یە ب خوینا سەدان ھزار شەھید و ئەنفال و کیمیابارانکرنێ ھاتیە ڤەژارتن و لبن مەترسیا دوژمنان دوور کریە ، ھەمی بەرھەڤیێن دیتر ژی بێ کێماسی و ب رێک و پێکی دابین کرینە و ل بەندا مزگینیا گەھشتنێ نە ، ئەوژی ب ئێک گۆتاریا پارتیێن کوردستانی . ب دیتنا من ئەوژی ھەتا رادەیەکێ زۆر ھاتیە دابینکرن و ئەوێن نەھاتی ژی چ کاریگەری نی یە ، چونکی یا گرنگ بریارا خەلکێ کوردستانێ یە کو د ریفراندۆما ( ٢٥ ) ئیلۆنا ئەڤ سالە ب پرانیا دەنگێن بەلێ بۆ سەرخۆبوونێ دێ ھێتە پەسند کرن و ھەول و بزاڤێن وان حزب و لایەنێن مینا گوڕان و کۆمەلا ئیسلامی و وان سازیێن راگەھاندنێ ئەوێن ڤێ پرسا نشتیمانی و چارەنڤیس ساز لبەرچاڤێن خەلکی رەش دکەن و دکەنە مەترسی لسەر ئاییندێ کوردستانێ سەرناگرن و دێ بیتە ( انقلب السحر و علی الساحر ) ، ئانکۆ پیلانا ڤان پیلانگێرا لسەر وان دێ بنەڤ پیلان و کەڤنە د وێ خەپکێ دا , بۆ ھەتا ھەتا دێ روورەش و شەرمزارێن دیرۆکێ بن . پەیاما مللەتی بۆ ھەمی حزب و لایەنێن کوردستانێ ئەوە ، ژمێژەیە ئەم چاڤەرێ ژڤانێ سەرخۆبوونا کوردستانێ و د چاڤەرێبوونێ دا ئەم ماندی بووین و زێدەتر خۆ ل ھیڤیا ئێک بوون و ئێک گۆتاریا وە ناگرین ، مە پێ باشە ئێک بن ، لێ ئێک بن یان ئێک نەبن مە بریارا ئێکجاری و چارەنڤیس ساز لسەر راپرسی و سەرخۆبوونا کوردستانێ دایە و پشتەڤانیا ھەر کەس و لایەنەکی نە ئەوێن پشتەڤانی و رێبەرایەتیا پرۆژێ سەرخۆبوونا کوردستانێ دارشتی و داکۆکییێ لێ دکەن چونکی ئاییندێ نەتەوا کورد پێڤە یێ گرێدایە ، راستە ئەڤرۆ ئەم شانازیێ دکەین کو سەرۆک مەسعود بارزانی و پارتی دیموکراتی کوردستانی ب پشتەڤانیا پرانیا پارتیێن کوردستانی رێبەرایەتیێ لێ دکەن ، لێ سەرگرتنا ڤی پرۆژەی نە تنێ د بەرژەوەندا وان دایە بەلکی ئارمانجا نەتەوا کورد و کوردستانیا یە و د بەرھەڤ نینە ڤێ ئارمانجا ھەمی خەلکێ کوردستانێ بکەینە قوربانی بەرژەوەندێن ڤێ حزبێ یان حزبا ھە ، داکۆ ھندەک وەلاتێن نەیارێن کوردستانێ ل خۆ رازی بکەن . دبێژینە ھەمی ئالیێن سیاسی یێن کوردستانی ئەم بۆ راپرسی و سەرخۆبوونا کوردستانێ د بەرھەڤین و ل چاڤەرێبوونێ ئەم ماندی بووین و زێدەتر خۆ لبەر ناگرین .