خۆپیشاندەرانی عێراق ناوی کاندیدانی سەرۆکایەتیی حکوومەتی وڵاتەکەیان، دەدەنە سەرکۆمار.

ئاژانسی هەواڵیی فەرمیی عێراقی بڵاوی کردووەتەوە، کە چاوەڕوان دەکرێ سەرۆکۆماری عێراق ”لە رۆژانی داهاتوودا“ ناوی کاندیدی سەرۆکایەتیی حکوومەت رادەگەیەنێت و رایدەسپێرێت.

خۆپیشاندەران لەڕێی نوێنەرەکانیانەوە، ناوی کاندیدانی سەرۆکایەتیی حکوومەتی عێراقیان داوەتە سەرکۆمار و ئاژانسی هەواڵیی فەرمیی عێراق ناوی بەشێکیانی ئاشکرا کردووە، کە بریتین لە؛

- محەمەد شیاع سوودانی

- ئەسعەد عیدانی

- مستەفا کازمی

- دادوەر رائید جوحی

عادل عەبدولمەهدی (لەدایکبووی 1942 لە بەغدا)، لە مانگی 10ـی 2018 وەک سەرۆک وەزیرانی عێراق دەست بەکار بوو و لە رۆژی 30-11-2019 دەستی لەکار کێشایەوە و رۆژی دواتر پەرلەمانی وڵاتەکەی دەست لەکار کێشانەوەکەی قبوڵ کرد.

دەست لەکار کێشانەوەی عەبدولمەهدی لەسەر داوای مەرجەعی باڵای شیعەکانی عێراق و دوای پەرەسەندنی خۆپیشاندانەکانی وڵاتەکەی، هات.

خۆپیشاندانەکان لە رۆژی 2-10-2019ـەوە لە بەغدا و زۆربەی شارەکانی عێراق دژی گەندەڵی و نەبوونی خزمەتگوزاری، دەستیان پێ کرد.

بەهۆی خۆپیشاندانەکان و کەوتنەوەی توندوتیژی تێیاندا، زیاتر لە 400 هاووڵاتی و کارمەندی ئەمنی گیانیان لەدەست داوە و زیاتر لە 16 هەزاری دیکەش بریندار بوون، جگە لە کەمئەندامبوونی 700 کەس و ژمارەکانیش بەردەوام لە بەرزبوونەوە دان.














باسنيوز