پەرلەمانتارێکی ئیئتیلافی دەوڵەتی یاسا، کە ئیئتیلافەکەی لە کەسانی شیعەمەزهەب پێک دێت و لەلایەن نوری مالیکییەوە سەرۆکایەتیی دەکرێت، سوننەمەزهەبەکانی عێراق بە ”پیلانگێڕی و ئاژاوەنانەوە“ تۆمەتبار دەکات.

عەواتف نعمە، پەرلەمانتاری دەوڵەتی یاسا لە بەیاننامەیەکدا رایگەیاندووە، ئوسامە نوجەیفی، جێگری سەرۆک کۆماری عێراق بە ئامانجی ”ورووژاندنی ئاژاوەی تائیفی و سیاسیی“ سەردانی ئەمریکای کردووە.

ئەو پەرلەمانتارەی دەوڵەتی یاسا ئوسامە نوجەیفی و سەرکردەکانی پێکهاتەی سوننەمەهەبی عێراق بە ”کارکردن بۆ بەرژەوەندیی وڵاتانی دەرەکی“ بە تایبەت تورکیا تۆمەتبار دەکات و پێیان دەڵێ، ”واز لە پیلانگێڕی و ئاژاوە دروستکردن بێنن“.

دوای رووخاندنی رژێمی بەعسی عێراق لە ساڵی 2003، حزبە شیعەمەزهەبەکانی عێراق دەستیان بەسەر حوکمڕانیی عێراقدا گرت و هەردوو پێکهاتەی سوننەمەزهەب و کوردستانیان پەراوێز خست و میلیشیا شیعەکانیش بەردەوام دژایەتیی ئەو دوو پێکهاتەیە دەکەن.

لە سەردەمی سەرۆک وەزیرانیی نوری مالیکی لە مانگی 6ـی 2014دا، نزیکەی دوو هەزار چەکداری داعش نیوەی عێراقیان داگیر کرد و هەرەسیان بە سوپای عێراق هێنا، کە مالیکی فەرماندەیی ئەو سوپایەی دەکرد.









باسنيوز