ئەندامێكی لیستەكەی نوری مالیكی سەری سوورماوە لەسەر دەسەڵاتی دادگایی لە عێراق كە ناتوانێت هیچ كارێك بكات لەسەر هەناردە كردن و فرۆشتنی نەوتی كوردستان.

سەمیرە موسەوی ئەندامی ئەنجومەنی نوێنەرانی عێراق لە لیستی دەوڵەتی یاسا لەبەیاننامەیەكدا ڕایگەیاند: داوا لە ئەنجومەنی دادوەری باڵا و دادگای ئیتحادی گشتی دەكەین كەوا كارەكانی خۆیان لەبیر نەكەن لەسەر هەر لایەنێك بەپێی دەستوری عێراق كار ناكات و لە ئێستادا حكومەتی هەرێمی كوردستان نەوت هەناردە دەكات و دەیفرۆشێت لەرێگای وڵاتی توركیا لەبەندەری جیهان و پێویستە سزایی هەردوو لایەن بدرێت چونكە دەبێت هەر بەرمیلێك نەوت هەناردە بكرێت دەبێت بەڕەزامەندی حكومەتی ناوەندی بێت.

لەبەیاننامەكەدا هاتووە: بەهۆی ئەوەی هەڵوێستی سیاسی لە عێراق زۆر سستە لەم كاتەدا حكومەتی كوردستان بەهەلێكی باشی زانی بۆ ئەوەی نەوت بفرۆشێت بەشێوەیەكی نایاسایی و ئەم سستیە بەهۆی رێكەوتنە سیاسیەكان بۆ پێكهێنانی حكومەتی نوێ ی عێراق و جێگای سەرسوورمانە كەوا نە ئەنجومەنی نوێنەرانی عێراق نەدادگایی ئیتحادی و دادگای دادوەری باڵا هیچ هەڵویستێكیان لەبارەی فرۆشتنی نەوت دەرنەبڕیوە و پێویستە سكاڵا لەرێگای دادگایی نێودەوڵەتی لەسەریان تۆمار بكرێت.

جێگای باسە، حكومەتی هەرێمی كوردستان سوورە لەسەر هەرناردە كردن و فرۆشتنی نەوتی هەرێمی كوردستان كە لە22ی ئەم مانگەوە بەشێوەیەكی فەرمی لە توركیا نەوتی كوردستان فرۆشراوە و داهاتی ئەو نەوتەش بۆ موچەیی فەرمانبەران و بودجەی هەرێم دادەنرێت