وه‌زاره‌تی به‌رگری ئه‌مه‌ریكا "پێنتاگۆن" رایگه‌یاند، ئه‌و مووشه‌كانه‌ی له‌ هێرشه‌كه‌ی سه‌ر شاری هه‌ولێر به‌كارهاتوون، دروستكراوی ئێرانن و تارانی به‌وه‌ تۆمه‌تبار كرد، كه‌ سه‌قامگیری ناوچه‌كه‌ ده‌شێوێنێت.

به‌گوێره‌ی كه‌ناڵی ئه‌لعه‌ره‌بییه‌، وه‌زاره‌تی ده‌ره‌وه‌ی ئه‌مه‌ریكا دووپاتیكردووه‌ته‌وه‌، "ئێمه‌ له‌و ئالنگارییه‌ ئه‌منییانه‌ راناكه‌ین كه‌ ئێران له‌ ناوچه‌كه‌ دروستیكردوون" هه‌روه‌ها گوتی: "ئێران به‌و كارانه‌ی هه‌وڵ بۆ شێواندنی سه‌قامگیری ناوچه‌كه‌ ده‌دات".

له‌ 15ی ئه‌م مانگه‌، شاری هه‌ولێری پایته‌ختی هه‌رێمی كوردستان به‌ 14 مووشه‌ك كرایه‌ ئامانج و له‌ ئه‌نجامدا 2 كه‌س گیانیان له‌ده‌ستدا و 4ی دیكه‌ش بریندار بوون.

شه‌وی رابردووش ناوچه‌ی سه‌وزی شاری به‌غدا كه‌ نوێنه‌رایه‌تی وڵاتان و باڵیۆزخانه‌ی ئه‌مه‌ریكا له‌خۆ ده‌گرێت، به‌ سێ مووشه‌كی جۆری كاتیۆشا كرایه‌ ئامانج، دواتریش له‌ دوو به‌یاننامه‌ی جیاوازدا هه‌ریه‌ك له‌ وه‌زاره‌تی ده‌ره‌وه‌ی ئه‌مه‌ریكا و وه‌زاره‌تی به‌رگری ئه‌و وڵاته‌ په‌نجه‌ی تۆمه‌تیان بۆ گرووپه‌ چه‌كداره‌كانی سه‌ر به‌ ئێران درێژ كرد و جه‌ختیان كرده‌وه‌، لێكۆڵینه‌وه‌كانیان ده‌ستیان پێكردووه‌ و له‌ كاتی گونجاودا وه‌ڵامی ئه‌و هێرشانه‌ ده‌ده‌نه‌وه‌.
k24 -