نەتەوە یەکگرتووەکان لە راپۆرتێکدا رایدەگەیەنێت، چەندین بەڵگە هەن دەیسەلمێنن کۆماری ئیسلامیی ئێران چەک بۆ میلیشیای ئەنساروڵڵا (حوسییەکان)ی یەمەن دەنێرێت.

لە راپۆرتەکەدا، کە ژمارەیەک پسپۆڕی سەر بە نەتەوە یەکگرتووەکان ئامادەیان کردووە و پێشکەشی ئەنجوومەنی ئاسایشی نێودەوڵەتییان کردووە، هۆشداریی لە زیاتر تێکچوونی بارودۆخی یەمەن، دراوە.

ئەو پسپۆڕانەی نەتەوە یەکگرتووەکان ئاماژەیان بە بوونی چەندین بەڵگە کردووە، کە دەیسەلمێنن لە ئێرانەوە چەک بۆ حوسییەکان دەنێردرێ و ئەمەش پێشێڵکردنی بڕیارەکانی نەتەوە یەکگرتووەکانە.

لە راپۆرتەکەدا ئاماژە بەوەش کراوە، کە حوسییەکان بڕی 423 ملیۆن دۆلاریان لە خەزێنەی وڵات بۆ بازرگانەکانی چەک لە ئێران، ناردووە.

حوسییەکان بزووتنەوەیەکی شیعەمەزهەبی یەمەنین و کۆماری ئیسلامیی ئێران هاوکاریی ماددی، مەعنەوی و لۆجیستییان دەکات.

لە سەرەتای شەڕی ناوخۆیی یەمەنەوە، کە لە ساڵی 2011 دەستی پێ کرد، حوسییەکان پاڵپشتیی خۆیان بۆ ئۆپۆزیسیۆن راگەیاند و لە مانگی ئەیلوولی 2014ش کودەتایان بەسەر حکوومەتی نوێی وڵاتەکەیاندا کرد و دەستیان بەسەر شاری سەنعای پایتەخت و زۆرینەی ناوچەکانی وڵاتەکەیاندا گرت.




باسنيوز