بەپێی زانیاریی سەرچاوەکانی مافی مرۆڤ لە ئێران، دەزگای دادوەریی ئەو وڵاتە سێ چالاکوانی ژن و دژبەرانی سەرپۆشی زۆرەملێ بەناوەکانی "یاسەمین ئاریانی، مونیرە عەرەبشاهی و موژگان کەشاوەرز" بە ٥٥ ساڵ حوکمی زیندان سزا داوە.



لەمبارەوە کۆمەڵەی چالاکانی مافی مرۆڤ لە ئێران (هێرانا) بڵاوی کردووەتەوە لە ئەگەری یەکلابوونەوەی ئەو حوکمە و بە پشتبەستن بە مادەی ١٣٤ی یاسای سزای ئیسلامی، هەرکامەیان دەبێ ١٠ ساڵ لە زینداندا بن.



ماڵپەڕی هێرانا لە وردەکاریی حوکمی ئەو سێ چالاکوانە بڵاوی کردووەتەوە: "هەرکام لەو سێ چالاکوانە بە تۆمەتی "کۆبوونەوە بەمەبەستی تێکدانی تەناهی و ئاسایشی نەتەوەیی" هەرکام بە ٥ ساڵ زیندان، بە بۆنەی "پڕوپاگاندا لەدژی حکوومەت" هەرکام بە یەک ساڵ زیندان و بەهۆی "هاندانی خەڵک بۆ بێ ئەخلاقیی ناو کۆمەڵ" هەرکام بە دە ساڵ زیندان حوکم دراون هاوکات موژگان کەشاوەرز، بەهۆی "سووکایەتی بە پیرۆزییەکان" بە ٧ ساڵ و شەش مانگ زیندان حوکم دراوە.



بەپێی زانیاریی پارێزەرانی ئەو سێ چالاکوانە ژنە، حوکمی بەندکرانیان دوێنێ چوارشەممە لە دادگای تاران و بە ئامادەبوونی خۆیان و بەبێ پارێزەرەکان پێیان ڕاگەیەندراوە.



ئەو تۆمەتانەی دراوەتە پاڵ ئەو سێ چالاکوانە ژنە، "دژایەتیی سەرپۆشی زۆرەملێ، هاندان و ڕەخساندنی دەرفەت بۆ فەسادی ئەخلاقی" بووە کە لەلایەن هێزە ئەمنیەکان و دەزگای دادوەریی ئێرانەوە دڕووبەڕوویان کراوەتەوە.



بەپێی گرتە ڤیدیۆیەک کەلە تۆڕە کۆمەڵایەتییەکان بڵاو کراوەتەوە لەناو هێڵی میترۆی تاران بەبێ لەچکە و ڕووبەند لە ڕۆژی جیهانیی ژناندا گوڵیان پێشکەشی خەڵک کردووە.




باسنيوز