وەزیری نوێی بەرگریی ئەمریکا سەردانی وڵاتانی رۆژهەڵاتی ناوەڕاست دەکات.

مارک ئیسپەر، وەزیری بەرگریی ئەمریکا رایگەیاندووە، کە لە سەردانەکەیدا، لەگەڵ فەرماندە باڵاکانی سوپای وڵاتەکەی لە وڵاتانی رۆژهەڵاتی ناوەڕاست و کەنداوی عەرەبی، کۆ دەبێتەوە.

لەو سەردانەیدا، کە بڕیارە ئەم هەفتەیە ئەنجامی بدات، مارک ئیسپەر تاوتوێی مەترسیی و هەڕەشە و ”گێچەڵ“ـەکانی ئێران لەسەر ناوچەکە دەکات.

زیاتر لە ساڵێکە پەیوەندییەکانی تاران و واشنتن گەیشتوونەتە خراپترین ئاست و ئەمریکا ژمارەیەک سزای بەسەر ئێراندا سەپاندووە.

دوای کشانەوەی ئەمریکا لە رێککەوتننامەی ناوکی و سەپاندنی چەندین سزا بەسەر ئێران، دۆناڵد ترەمپ هەڕەشەی لە هەموو ئەو وڵات و لایەنانە کرد، کە یان دەبێ بچنە بەرەی ئێران یاخود پابەندی سزاکانی ئەمریکا بن بەسەر ئێران.

شەوی 8/5/2018، دۆناڵد ترەمپی سەرۆکی ئەمریکا بڕیاری کشانەوەی وڵاتەکەی لە رێککەوتنی ناوکیی ئێران و وڵاتانی پێنج + یەک، واژۆ کرد.

رێککەوتنی ناوکیی ئێران و وڵاتانی پێنج + یەک لە سەرەتای نیسانی 2015 لە شاری لۆزان لە سویسڕا واژۆ کرا، کە بەپێی ئەو رێککەوتنە ئێران دەستبەرداری دروستکردنی چەکی ناوکی دەبێت و ئەمریکاش سزاکانی لەسەر ئەو وڵاتە سووک دەکات.

وڵاتانی پێنج + یەک بریتین لە پێنج وڵاتی ئەندامی هەمیشەیی ئەنجومەنی ئاسایشی نێودەوڵەتی (ئەمریکا، فەرەنسا، رووسیا، بەریتانیا و چین) و ئەڵمانیا پێک دێت.








باسنيوز