ئەمڕۆ سێشەممە لەناو وەزارەتی پەیوەندییەکانی ئێران کەسێک بە نیشانەی ناڕەزایی بە بڕیار و هەڵسوکەوتەکانی ئەو وەزارەتە ئاگری لە جەستەی خۆی بەرداوە.


میدیا فەرمییەکانی ئێران بڵاویان کردەوە، کەسێکی بەڵێندەر کە لەگەڵ وەزارەتی پەیوەندییەکانی ئێران پەیوەندیی هەبووە و خاوەنی کۆمپانیایەکی فرۆشیار و دابینکردنی ئەنتەرنێت بووە، بە نیشانەی ناڕەزایی چووەتە ناو بینای وەزارەتی پەیوەندییەکانی ئێران و بەنزینی بە خۆیدا کردووە و خۆی سووتاندووە.


زانیارییەکان باس لەوە دەکەن، پاش ئەو ڕووداوە هێزە ئەمنییەکانی ئەو وەزارەتە فریای کەوتوون و ڕەوانەی نەخۆشخانە کراوە و هەتا ئێستا زیندووە.

ئەنتەرنێت لە ئێران، کە وەزارەتی پەیوەندییەکان و تەکنۆلۆژیا چاودێریی دەکات، یەک لەو پرسە جێگەی مشتومڕانەیە و بابەتی سانسۆر و فلتەرکردنی زۆرێک لە تۆڕە کۆمەڵایەتی و ماڵپەڕەکان ناڕەزییەکی زۆری لێ کەتووەتەوە.

هەتا ئێستا لە تاران و لەناو دامودەزگا فەرمییەکانی ئێران چەندان حاڵەتی ئاگر لە خۆبەردان ڕووی داوە.










باسنيوز