وڵاتێکی عەرەبی پێشنیازی پێدانی مافی مانەوە (ئیقامە) بە سەرۆکی لەسەرکار لادراوی سوودان دەکات.

بەپێی هەواڵی میدیا سوودانییەکان، وڵاتە عەرەبییەکە کەوتووەتە کەنداوی عەرەبی (بەڵام ناوەکەی ئاشکرا نەکراوە) و ئەنجومەنی سەربازیی قۆناغی گواستنەوە، کە ئێستا سەرکردایەتیی سوودان دەکات، بڕیار لەبارەی قبوڵکردن یان رەتکردنەوەی پێشنیازەکە دەدات.

هەروەک میدیاکانی ئەو وڵاتە باسی دەکەن، پێشنیازەکە پێدانی مافی مانەوەی هەمیشەیی بە عومەر بەشیر و ئەندامانی خێزانەکەی لەخۆ دەگرێت و بەشیریش رەزامەندیی لەسەر داوە.

عومەر بەشیر لە ساڵی 1989 بە کودەتایەکی سەربازی دەسەڵاتی سوودانی وەرگرت و تا ئەساڵ (2019) حوکمی ئەو وڵاتەی کرد.

رۆژی پێنجشەممە 11-4-2019، سوپای سوودان لەسەر کار لادانی عومەر حەسەن بەشیری سەرۆکی وڵاتەکەی راگەیاند و ئێستا لە گرتووخانەیەک لێکۆڵینەوەی لەگەڵ دەکرێت.

دوای لەسەرکار لادانی سەرۆکی وڵات، حزبەکەیشی لە دەسەڵات دوور خرایەوە و عومەر بەشیر و دەیان سەرکردە و بەرپرسی ئەو حزبەش خرانە زیندانەوە.










باسنيوز