عەلی لاریجانی، سەرۆکی پەرلەمانی ئێران رایگەیاند، کۆماری ئیسلامی ئێران هیچ بەهایەک بۆ داواکانی یەکێتی ئەوروپا دانانێت چونکە ئەو یەکێتیە پشتگیری ئێرانی نەکردووە بەرامبەر بە سزاکانی ئەمەریکا.

لە کۆبوونەوەی لەگەڵ وۆڵفگان گێرستل، سەرۆکی گروپی دۆستایەتی پەرلەمانی ئێران و ئۆستریا، لاریجانی هێرشی تووندی کردە سەر وڵاتانی ئەوروپا و رایگەیاند: "یەکێتی ئەوروپا تەنها قسەی هەیە و کرداری نییە. بە بڕوای ئێمە یەکێتی ئەوروپا ئەو قورسایەی نییە کە بتوانێت کێشەکان چارەسەر بکات".

راشیگەیاند: "کاتی خۆی، ئەوروپییەکان گووتیان کە مێکانیزمێکی روون لەبارەی نەوت و بارزگانی لەگەڵ ئێران لە ماوەی چەند هەفتەیەک جێبەجێ دەکەن، بەڵام ئەوە ساڵانێک رۆشت و رووینەدا".

لەگەڵ ئەوەشدا، سەرۆکی پەرلەمانی ئێران رایگەیاند، ئەوان بۆ رووبەڕووبوونەوەی ئەمەریکا پێویستیان بە ئەوروپا نیە و بەرامبەر بە فشارەکانی ئەمەریکاش بە بێ دەنگی نامێنەوە.

ئەمەریکا سوورە لەسەر ئەوەی نەوتی ئێران لە بازاڕەکانی جیهاندا قەدەغە بکات و ئێرانیش بە دوای رێگای جیاوازدا دەگەڕێت تاکو نەوتەکەی بفرۆشێت، داخستنی گەرووی هورمزیش لە لایەن ئێرانەوە، ئەگەری جەنگی لە نێوان هەردوو وڵات دروست کردووە.




K24