پەرلەمانی میسر دەستووری وڵاتەکەی بۆ درێژکردنەوەی ماوەی سەرۆکایەتیی سەرۆکی ئێستای وڵاتەکە، هەموار کرد.



بەشێک لە پەرلەمانتاران پرۆژەیەکیان بۆ درێژکردنەوەی ماوەی سەرۆکایەتیی عەبدولفەتاح سیسی، سەرۆکی میسر، پێشکەش کرد و رۆژی سێشەممە 16-4-2019ش پرۆژەکە بە دەنگی 531 ئەندام لە کۆی 596 ئەندام، پەسەند کرا.



پرۆژەکە هەموارکردنی بڕگەیەکی دەستووری لە خۆ دەگرت، کە باس لە ماوەی سەرۆکایەتیی سەرۆک دەکات و هەموارکردنەکەش تەنیا بۆ عەبدولفەتاح سیسییە، چونکە لە هەموارەکەدا هاتووە، ”خولی سەرۆکایەتیی سەرۆکی ئێستا لە 2018 دەستی پێ کردووە و لە 2024 کۆتایی دێت و دەتوانێ بۆ خولی سێیەمیش (2024 - 2030، خۆی هەڵبژێرێتەوە.



سیستەمی حوکمڕانیی وڵاتانی عەرەبی دوو جۆە، شاهانە و کۆماری، بەڵام لە زۆرینەی کۆمارییەکان سەرۆکەکان بۆ ماوەیەکی درێژ لە حوکم دەمێننەوە و بەشێکیشیان سەرۆکایەتیی وڵاتیان رادەستی کوڕەکانیان کردووە.



عەبدولفەتاح سیسی لە سەردەمی سەرۆکایەتییمحەمەد مورسی، وەزیری بەرگریی میسر بوو، بە بەکارهێنانی سوپا لە ساڵی 2013 کودەتای بەسەر محەمەد مورسیدا کرد و خۆی وەک سەرۆک کۆماری میسر ناساند.



دوای گرتنە دەستی دەسەڵاتی میسر، رەوتی ئیخوان موسلیمین و محەمەد مورسی، کە یەکێک بوو لە سەرکردەکانی ئیخوان، وەک تیرۆریست ناساند.




باسنيوز