زەڵمای خەللیل‌زاد، باڵیۆزی پێشووتری ئەمریکا لە نەتەوە یەکگرتووەکان، عێراق و ئەفغانستان، ڕای گەیاند، ئێران سیاسەتێکی دوو لایەنی لە هەمبەر ئەفغانستان هەیە و یارمەتیی قاعیدە و تاڵەبانیش دەکات.



خەلیل‌زاد کە ئەندامی حزبی کۆماریخوازە و لەگەڵ کابینەکەی ترەمپ، پەیوەندییەکی نزیکی هەیە لە لێدوانێکدا ئاماژەی بە ناسەقامگیریی ئەمنی و سیاسیی ئەفغانستان کردووە و ئاشکرای دەکات ئێران لە جەند قۆناغی جیادا پشتگیریی سیاسی و سەربازیی قاعیدە و تاڵیبانی کردووە و هاوکات خۆی بە هاوپەیمانی حکوومەتی ئەفغانستانیش دەزانێت.



زەڵمای خەلیل‌زاد، یەکەم ئەمریکییەکی بە ڕەچەڵەک ئەفغانییە کەلە ئاستی بەرپرسیارێتیی باڵای ئەمریکا چووەتە ناخی دەزگا دەوڵەتییەکانی ئەفغانستانەوە.



خەلیل‌زاد، پاش هێرشی 11ی سیپتەمبەر و هێرشی ڕژێمی تاڵیبان، گرنگترین سیمای حکوومەتی ئەمریکا بووە لە بەرانبەر دۆخی ئەفغانستاندا و وەک نێردەی تایبەتی ئەمریکا لەو وڵاتە خزمەتی زۆری کردووە.



ئەو دیپلۆماتە ئەمریکییە لە بەرانبەر تاڵیباندا هەڵوێستێکی توندی هەبووە و لە دوایین پۆستی خۆیدا وەک باڵیۆزی ئەمریکا لە ئەفغانستان، ڕۆڵێکی سەرەکیی لە بە‌هێزکردنی دەوڵەتی حامید کەرزای دا هەبوو.




باسنیوز