Tîma Futbolê ya Jinan a Hewlêrê di fînalê de 1-0 zora Tîma Futbolê ya Jinan a Soranê bir.

Bi vê encamê tîma Hewlêrê bû şampiyona Kupaya Komariyê ya Jinan a Îraqê.

Ev kupa li navçeya Soranê hat lidarxistin.

8 tîmên ji Îraq û Herêma Kurdistanê beşdarî turnuvayê bûn.

Di turnuvayê de tîmên Hewlêr û Soranê derbasî fînalê bûn.

Lîstikvana stêrk a Hewlêrê Şoxan Nûredînê gola tekane ya maça fînalê avêt û bi vê encamê tîma Hewlêrê kupa bir mala xwe.

Birêvebirê Sporê yê Îdareya Serbixwe ya Soranê Şivan Reşîd bal kişand ser girîngiya organîzasyonê û got:

"Tîmên ji gelek bajarên Kurdistan û Îraqê beşdarî turnuvayê bûn. Soranê cara yekem mazûvaniya organîzasyoneke ew qasî mezin a futbola jinan kir.

Zanîngeha Soranê û birêvebiriya herêmê jî piştgiriyeke mezin da organîzasyonê."

Ezmûna Hewlêrê

Tîma Futbolê ya Jinan a Soranê tenê 3 sal berê hatiye avakirin.

Wê tîmê bi piştgiriya alîgirên xwe armanc dikir ku kupayê li mala xwe bihêle.

Lê tecrube û kalîteya kadroya tîma Hewlêrê ya ku xwedî dîrokeke 9 salî ye destûr neda vê yekê.

Şoxan Nûredîna ku tekane gola maçê avêt, piştî pêşbirkê daxuyanî da û got:

"Her fînal zehmet e. Soranê têkoşîneke gelekî baş da û ew jî tîmek bûn ku heqî vê kupayê dikir. Lîstina fînalê ya du tîmên Kurdan cihê serbilindiyê ye ji bo me."

Lîstikvana Soranê Selar Ebdulwahîdê jî da zanîn ku wan çi ji destê wan hatiye kiriye. Lê vê carê şans ne bi wan re bûye.

Ebdulwahîdê bi bîr xist ku wan di heman turnuvayê de di qonaxa koman de bi penaltiyan zora Hewlêrê biribû.

Jinên Kurd di futbola Îraqê de serkeftî ne

Birêvebirê Giştî yê Sporê yê Kurdistanê Serdar Îsmaîl jî bal kişand ser serkeftina futbolîstên Kurd ên jin ên û got:

"Beşeke girîng a tîmên jinan ên li Îraqê ji futbolîstên Kurd pêk tên. Ev yek jî nîşan dide ku spora jinan li Kurdistanê gihîştiye asteke girîng."

Kupaya Komariyê ya Jinan a Îraqê îsal cara sêyemîn hat lidarxistin.

Tîma Futbolê ya Jinan a Hewlêrê di nava 3 sezonan de cara duyemîn e ku şahiya şampiyoniyê dijî.

 

Rudaw