Berdevkê Wezareta Derve ya Almanyayê ragihand ku hikûmeta welatê wî her ji destpêkê ve li dijî ‎operasyona Tirkiyê ya li ser bakurê rojhilatê Sûriyê û herwiha dijî veguhestina penaberên Sûrî bûye bo ‎navçeya aram.‎

Berdevkê Wezareta Derve ya Almanyayê ‎Christopher Burger di civîneke çapemeniyê de got: “Em ne ‎ligel wê yekê ne penaberên şerê navxwe yê Sûriyê ku niha li Tirkiyê ne bo bakurê rojhilatê Sûriyê û ‎navçeya aram bên veguhestin, ku dibe ev dijî xwesteka wan bi xwe be jî.”‎

Berdevkê Wezareta Derve ya Almanyayê ‎amaje bi wê yekê jî da ku ev ne tenê helwêsta Almanyayê, lê ‎her ji destpêka operasyonê ve ligel hevbeşên xwe yên Ewropî li ser vê mijarê hevra bûne û di ‎daxuyaniyekê de jî ev helwêsta Yekîtiya Ewropayê ragihandine.‎

Christopher Burger dibêje: "Em razî nabin ku penaberên şerê navxwe yê Sûriyê ku niha li Tirkiyê ne bo bakurê rojhilatê ‎Sûriyê û navçeya aram bên veguehstin, ku dibe ev li dijî xwesteka wan bixwe jî be. Ev ew helwêst e ‎ku em ligel hevbeşên xwe yên Yekîtiya Ewropayê jî li ser hevra ne, her ji wê dema Tirkiyê 9ê ‎Cotmehê dest bi operasyona xwe ya leşkerî kir."‎

Tirkiye ji roja 9ê Cotmehê ve êrîşî Rojavayê Kurdistanê kiriye, lê belê ji roja 17ê Cotmehê ve Amerîka û Tirkiye li ser rawestandina êrîşî û agirbesteke demkî ya 150 saetî rêkeftinek kirin, ku ev agirbest îro saet 22:00 bi dawî tê.

Rudaw