Li Rojhilatê Kurdistanê xelkekî zêde beşdariyê li serxweşî û şîna wan ciwanan dikin ku Pêşmergeyên Komeleya Zehmetkêşên Kurdistana Îranê bûn û ji aliyê Îranê ve hatin darvekirin.

Wek di vîdeoyan de jî diyar dibe îro 30.01.2024ê li bajarê Dêwlan û Bokan ên Rojhilatê Kurdistanê, herçend termê wan ciwanan ji aliyê Îranê ve radestî malbatên wan nehatibe kirin jî, xelkekî zêde beşdarî serxweşiya Mihemed Feramerzî û Wefa Azerbar dikin û malbatên wan ciwanan bi tenê nehiştine, ku ew jî ji çar girtiyên siyasîbûn duh ji aliyê Îranê ve hatin darvekirin.

Şeva borî Rêxistina Mafê Mirovan a Hengaw belav kir, Îranê termê wan çar girtiyên siyasî nedaye malbatên wan û ragehand, li cîheke nediyar veşartine.

Duh 29.01.2024ê demjimêr 05:00ê serê sibehê çar girtiyên siyasî yên kurd ku Pêşmergeyên Komeleya Zehmetkêşên Kurdistana Îranê bûn û hatin darvekirin û navên wan jî waha ye: Muhsîn Mezlûm ê 27 salî yê xelkê Mehabadê. Wefa Azerbar ê 26 salî yê xelkê Bokanê. Mihemed Feramerzî yê 28 salî yê xelkê Dêwlanê. Pîjman Fatîhî yê 29 salî yê xelkê Kamêranê. Duh ew çar girtiyên kurd li girtîgeha Qizilhesar a bajarê Kerec a Îranê hatin darvekirin.  

 

Basnews