Serokê herêma Kurdistanê bo 40 saliya enfal kirina Barzaniyan peyamek weşand.

Em îro bi rêz û hurmet 40 saliya enfalkirin û wendakirina 8000 zarok, ciwan, mêr û kalên Barzanî yên ku di dawiya Tîrmeha heta nîvê Tebaxa 1983ê, li kampên bi zorê lê hatîne bi cîh kirin, bûne qurbaniyên tawaneke hovane û reşgîriyê ji aliyê rejîma hîngê ya Iraqê ve êdî ew qed nevegeriyan.

Bi hezaran malbatên Barzaniyan yên bê desthilat li kampa Quştepe, Behirka, Herîr, Soran û cihên din bê bav û bira man û bi hezaran jinên Barzanî bê mêr man û neçar bûn rûbirûyê çarenivîsekê ne diyar û dijwar bibin û li hember bi dehan derdeserî û nexweşiyan li berxwedan û bi tenê man.

Ew ji zarokên xwe ra bûne bav û ji bo perwerdekirin û debara jiyana xwe û mezinkirina wan gelek êş kişandin. Wan li hember tunebûn, xizanî û tenêtiyê tehemûl kirin û bi moral û ruhekî mezin rûbirûyê jiyanê bûn û bi jîrî nifşekî niştimanperwer û welatparêz bi jêhatî perwerde kirin. Ez destên her yek ji wan dayikên mîhreban û dilsoz maç dikim.

Enfalkirina Barzaniyan wek hemû tawanên ku li dijî gelê Kurdistanê hatine kirin, ne tenê hêz û îradeya gelê me ya ji bo têkoşîna li dijî zilm û dîktatoriyê sist nekiriye, lê rihê rûbirûbûnê û îradeya serkeftin û azadî, li cem tevahiya gelê Kurdistanê germtir kir û bi baweriyeka mukimtir berdewamiyê bi tekoşînê da.

Bi vê minasebetê em silav li qurbaniyên Enfalê û hemû şehîdên Kurdistanê dikin û bejna xwe li hember giyanê wan ditewînin. Silav û spas ji bo hemû camêrên Hewlêr û derdora wê, li Herîr, Batas, Soran û li her derê ku lê bûn, ku alîkariya malbatên enfalkiriyên Barzanî kirin û sitarê dane wan.

Di vê helkeftê da ku Herêma Kurdistanê di rewşeke hestiyar ra derbas dibe, em tekezî li ser yekdengî û yekrêziya hemû partî û pêkhatên Kurdistanê dikin ku yekane rêya serfirazî û serkeftinê ye.

Serokê Herêma Kurdistanê

Nêçîrvan Barzanî

31.07.2023