Ji ber baranê li çend deverên Başûrê Kurdistanê lehî rabû
Berdevkê Berevaniya Şaristanî ya Silêmaniyê Rêkan Cemal ji Tora Medyayî ya Rûdawê re ragihand: “Di encama wê barana zêde de av ketiye nav malên li du taxên bajêr. Li taxên Raperîn û Qulereysî tîmên me çûne hawara wan malan.”
Rêkan Cemal herwiha eşkere kir ku ji ber baranê li çend cadeyan asta avê bilind bûye û got: “Bi alîkariya tîmên şarevanî, em bi çareserkirina wê pirsgirêkê re mijûl in.”
Rêveberê Berevaniya Şaristanî ya Hewlêrê Şiwan Ebdulqadir li ser vê mijarê diyar kir: “Tenê li taxên Seydawa û Gilkend lehî rabûye.
Lehiyê astenga hatûçûnê di navbera Silêmanî û Hewlêrê de çêkiriye
Lehiyê astenga hatûçûnê li ser rêya navbera Silêmanî û Hewlêrê çêkiriye. Qeymeqamê Navçeya Dukanê Şaho Usman ragihand: “Ji bo gihiştina hawara xelkê, me hemû hêzên xwe li nav Dûkanê û li her pênc bajarokên wê, xistine rewşa amadebaşiyê.”
Şaho Usman herwiha diyar kir: “Di encama barana zêde de ku li navçeya me bariya, astenga hatûçûnê li ser rêya sereke ya Silêmanî û Hewlêrê çêbûye. Me Şarevaniya Bajarokê Pîremegrûn erkdar kiriye ku dest bi paqijkirina rêyan bikin, daku hatûçûna li ser wê rêya sereke asayî bibe.”
Li Dûkan, Kelar û Derbendîxan deriyên dibistanan hatine girtin
Qeymeqamê Derbendîxanê Nasih Mela Hesen ji Rûdawê re ragihand: “Ji ber barana zêde, bi neçarî me dewama navendên perwerdeyê da sekinandin. Li çendîn cihan astengiya hatûçûnê çêbûye, bi taybetî li ber tunelê ku ji ber barana zêde cihekî biçûk a çiya hilweşiyaye û cade hatiye girtin, tîmên şarevaniyê bi paqijkirina rêyan mijûl in.”
Rudaw
