Fermandariya Navendî ya Artêşa Amerîka dibêje, di meha Sibatê de hêzên Hevpeymaniya Navdewletî bi sekirdayetiya Fermandariya Navendî ya Amerîkayê (CENTCOM) û hêzên hevbeş 48 operasyonên dijî DAIŞê li Iraq û Sûriyê encam dane û 22 çekdar kuştin.

Fermandariya Navendî ya Amerîkayê (CENTCOM) îro Înê di daxuyaniyekê de eşkere kiriye ku ew pişta xwe bi hêzên navxweyî û bi taybetî HSDê ve girê didin da ku guvaşê li DAIŞê bikin.

CENTCOM dibêje, di encama wan operasyonan de, 4 serbazên wan û segekî wan birîndar bûne û hemûyan jî çareserî wergirtine û ti serbazekî wan nehatiye kuştin.

Fermandariya Navendî ya Amerîka hişyarî dide ku bê guvaşa li ser terorê, hewlên DAIŞê yên ji bo kirêgirtin û xwerêkxistinê bihêz dibin û ew rêkxistin şiyanên xwe ji bo encamdana êrîşan li navçeyê û li dijî hevpeymanan û berjewendiyên Amerîka rêk dixe.

Artêşa Amerîkayê li ser operasyonên xwe yên li Iraqê dibêje, wan 33 operasyon encam dane ku hemû operasyonên hevbeş in li gel hêzên ewlekariyê yê Iraqê û di encamê de 17 çekdarên DAIŞê kuştine, 14 çekdar jî girtine.

 

Rudaw