Li ser sînorê di navbera Sûriyê û Tirkiyê de, hejmarek deriyên sînorî hene. Beriya kirîza li Sûriyê 8 deriyên sînorî li ser sînorê wî welatî yê bi Tirkiyê re hebûn. Niha deriyekî nû bi navê Şaxê Zeytûnê li aliyê sînorê Herêma Efrînê ya Rojavayê Kurdistanê tê vekirin.



Li aliyê Sûriyê, deriyên sînorî yên li ser sînorê Tirkiyê, di destê 3 aliyên; Hikûmeta Sûriyê, Rêveberiya Xweser a Rojavayê Kurdistanê û Opozisyona Sûriyê de ne, lê li aliyê din, hemû derî di bin kontrola hikûmeta Tirkiyê de ne.



Deriyên sînorî yên Qamişlo, Dirbêsiyê, Girê Spî, Kobanî, Cerablus, Bab el-Selame, Bab el-Hewa û Keseb, ew heşt deriyên sînorî ne, ku li ser sînorê Sûriye û Tirkiyê ne.



Ji wan deriyan, 2 deriyên Qamişlo û Keseb di destê hikûmeta Sûriyê de ne û herdu derî jî girtî ne û ti liv û tevgereke bazirganî, yan jî hatin û çûna xelkê di wan deriyên sînorî re nayê kirin.



Herwiha, 3 deriyên Dirbêsiyê, Girê Spî û Kobanî jî di dstê Rêveberiya Xweser û Yekîneyên Parastina Gel (YPG) de ne û ew hersê derî jî girtî ne.



Li aliyekê din sê deriyên sînorî yên Cerablus, Bab el-Selame û Babe el-Hewa jî di destê hêzên opozisyona Sûriyê de ne. Her sê deriyên di destê opozisyonê de vekirî ne û him tevgera bazirganî wan deriyan tê kirin û him jî xelk di wan deriyan re hatin û çûnê dikin.



Niha deriyeke nû li aliyê Herêma Efrînê ya Rojavayê Kurdistanê, bi navê deriyê sînorî yê Çiqlê Zeytûnê tê vekirin. Deriyê nû ji aliyê hikûmeta Tirkiyê ve tê vekirin û dikeve ser sînorê parêzgeha Hatay ya Tirkiyê.



Bi vekirina deriyê Çiqlê Zeytûnê, hejmara deriyên sînorî yên navbera Sûriye û Tirkiyê dibe 9 deriyên sînorî.



Hevkarên me li ser vê mijarê Video Wallek amade kirine û zanyariyên zêdetir li ser deriyên sînorî yên navbera Sûriye û Tirkiyê pêşkêş dikin.

Rudaw