Şandek ji Hêzên Ewleyiya Iraqê bi serokatiya Şêwirmendê Asayişa Neteweyî yê Iraqê Falih Feyyaz, ji bo hevdîtinan liser “pêkanîna Hêza Hevbeş a Êzdiyan ji bo parastina herêmê” û gengeşekirina babetê ligel aliyên siyasî yên herêmê, hatin Şingalê.

Şêwirmendê Asayişa Neteweyî yê Iraqê Falih Feyyaz ligel rêberên Kurdên Êzdî û fermanberan re civiya.

Jêderek di kombûnê de beşdarî kirî, ji K24 re eşkere kir, ku “Armanca seredana şand a Hêzên Ewleyî ya Iraqê, komkirina hêzên herêmê û şervanan di bin sîwanek a Hêzên Hevbeş de ye”.

Tê diyarkirin, ku ev helkeft liser pêşniyara Fermanderê Hêzên Parastina Êzîdxanê li Şingalê Heyder Şeşo ve pêkhatiye.

Ligor Serokê Giştî yê Partiya Azadî û Demokrasî ya Êzdî Heyder Şeşo, baştirîn rê ya parastina sivîlan, pêkanîna hêza hevbeş a ewleyî ye.

Piştî êrîşa rêxistina terorî ya DAIŞê, bi sedhezaran Kurdên Êzdî ji cîh û warên xwe bûn. Gelek reviyan û li welatên dewrûber û welatên Rojava bûn penaber.

Berî êrîşa DAIŞê li Kurdistanê û Iraqê 550 000 Kurdên Êzdî dijiyan. Lê, ligor Nivîsîngeha Rizgarkirina Êzdiyan, derdora 360 000 Kurdên Êzdî cîh û warên xwe bicîh hiştin û penayê derve kirin.

Piştî rizgarkirina deverê ji destê DAIŞ û heta niha 69 gorên bi kom hatine eşkere kirin.

Bi piştgiriya Hêzên Hevpeymanan, Hêzên Pêşmerge bi Serokatiya Serok Barzanî di Mijdar a 2015an de Şingal rizgar kirin.

Niha, bi egera rewşa aloz û dagîrkeriya deverê ji alî Heşda Şabî û Hêzên Iraqê ve, Kurdên Êzdî venegarin cîh û warên xwe.

K24