Di merasîmekê de li bajarokê Pîrmamê, rêkevtina navbera Tevgera Goranê û Partiya Demokrata Kurdistanê ji aliyê Celal Ceweher ji Goranê û Roj Nûrî Şawêys ji PDKê hate îmzekirin.



Endamê Polîtboruya PDKê, Roj Nûrî Şawêys piştî îmzekirina rêkevtinê di daxuyaniyekê de ragihand: “Me rêkevtina navbera Tevgera Goranê û Partiya Demokrata Kurdistanê îmze kir. Em hêvî dikin ev rêkevtin bibe sedema yekbûna rêzên tevahiya gelê Kurdistanê û pêşkevtina proseya siyasî, bi taybetî damezrandina Hikûmeta Herêma Kurdistanê û çareserkirina hemû kêşeyan, ku ev yek xwesteka hemû aliyan e.”



Dr. Roj Nûrî Şawêys herwiha got: “Armanc ji vê rêkevtinê tenê ne ev e ku em û Tevgera Goranê bi tenê bixebitin, û derî vekiriye bo hemû partiyên din ku heman xwestek hene ji bo pêşxistina karûbarên welatên me û parastina destkevtên gelê me.”



Şanda Goranê îro ji bo îmzekirina rêkevtina bi PDKê re gihîştibû bajarokê Pîrmamê.



Şanda Goranê ji Celal Cewher, Mistefa Seyid Qadir û Cemal Hacî Mehmûd pêk hatibû.



Herwiha şanda PDKê jî ji Dr. Roj Nûrî Şawêys, Hûşyar Zêbarî, Mehmûd Mihemed, Azad Berwarî û Firset Sofî pêk hatibû.



Rêkevtina navbera PDK û Goranê ji 30 xalan pêk tê ku 18 xalên wê taybet in bi rewşa Herêma Kurdistanê û 12 xal jî taybet in bi Bexdayê.

Rudaw