Çekdarên opozisyonê li herêma Efrînê ya Rojavayê Kurdistanê di berdewamiya binpêkariyên xwe yên di derheqê welatiyên Kurd ên herêmê de, kêl û gorên Kurdan têk didin.



Welatiyekî ji Efrînê, ku ji ber sedemên ewlehiyê nexwest navê xwe eşkere bike, ji Rûdawê re ragihand ku roja Çarşembiyê 16ê Çileya 2019an çekdarên opozisyonê kêl û gorên goristana gundê Edama yê ser bi bajarokê Reco ve têk dane û bi erdê re rast kirine.



Bi gotina wî welatiyê ji Efrînê, hinceta çekdaran bo têkdana kêl û goran, ew bûye ku ew kêl û gor ji erdê bilind in û li gor hizrê wan, divê bi erdê re bên rastkirin.



Hefteya bihorî jî çekdarên opozisyonê kêl û gor, li gundê Meydankê yê ser bi nehiyeya Şera yaEfrînê ve bi heman behaneyê têk dabûn û bi erdê re rast kiribûn.



Di Kanûna bihorî de jî, bi hinceta firehkirina rê, çekdaran heman kiryar li gundê Sinarê yê ser bi nehyeya Şera kiribûn û zêdeyî 500 gorên goristana wî gundî têk dabûn.



Herêma Efrînê ji 18ê Adara sala 2018ê ve û piştî şerekî 58 rojî ketiye bin kontrola hêzên artêşa Tirkiyê û çekdarên opozisyona Sûriyê.


Rudaw