Hejmarek ji parlementerên Fransayê daxwaz ji serokê welatê xwe kirine, ku divê Parîs piştgiriya hêzên Kurdî yên li Sûriyê bike û hevpeymaniya xwe bi Kurdan re bihêztir bike.



Li gorî Medyaya Fransî, 53 parlementerên wî welatî daxwaz kirine ku Parîs hewlên xwe yên ji bo perwerde û rahênana hêzên Kurdî zêde bike, û çekên zêde jî ji wan re bişîne.



Parlementerên Fransayê herwiha ragihandine, ku şervanên Kurd roleke mezin di şerê DAIŞê de lîstin û gelek dever ji destê DAIŞê rizgar kirin û divê piştgiriyeke mezin bo wan were pêşkêşkirin.



Li gorî wan parlementeran, têkçûna DAIŞê dibe sedema aramiya Fransa ji êrîşên terorê û tekez kirin, ku piştevaniya HSDê karekî exlaqî ye.



Parlementerên Fransayê di derbarê egera operasyona Tirkiyê ya li Rojhilatê Feratê de jî, hişyarî dane hikûmeta welatê Fransa û gotine, eger Tirkiye êrîşî wan navçeyan bike, dê DAIŞê xurt bibe û careke din dest bi êrîşan bike.



Wan parlementerên Fransî ragihandine ku divê Parîs bi çavê berpirsyariyê li erkê xwe binêre, û daxwazê ji Encûmena Asayişa Navdewletî bike, ku biryarê bide daku Kurdên Sûriyê parastî bin.

Rudaw