Neteweyên Yekbûyî têkildarî bûyera mirina bi guman a keça Kurd Jîna Emînî daxwaz kir, “lêkolîneke bê alî” bê kirin û “rastî ji malbata Jîna Emînî re bên aşkerekirin”.

Neteweyên Yekbûyî derbarê canjidestdana bi guman a keça Kurd a 22 salî Jîna Emînî ku ji aliyê polîsên Exlaqê yên Îranê ve li Tehranê hatibû desteserkirin, daxuyaniyek belav kir.

Di daxuyaniya xwe de, Neteweyên Yekbûyî dibêje, “Em daxwaza lêkolîneke bê alî û bi bandor derbarê bûyera canjidestdana Jîna (Mehsa) Emînî dikin û daxwaz dikin rastî ji malbata wê re bên aşkerekirin.”

Neteweyên Yekbûyî herwiha bang li hikûmeta Îranê kiriye û gotiye, divê berpirsên Îranê armanckirin û desteserkirina wan jinan rawestînin ku pabendî hîcabê nînin.

Neteweyên Yekbûyî herwiha amaje bi xwepêşandanên xelkê yên piştî wê bûyerê û tundiya hêzên emnî yên Îranê li hember wan xwepêşandan kiriye û “serederiya tund a hêzên emnî li hember xwepêşanderan şermezar” kiriye.