Îro li Hotêl Rotana ya Hewlêrê rêxistina Spark bi alîakriya Wezareta Derve ya Holendayê konferanseke navdewletî di derbarê Aştiyê û rûbirûbûna tundûtîjî û tundrewiyê saz kir.



Konfernas bi sponsoriya medyayî ta Tora Medyayî ya Rûdawê birêve diçe û ji 4 panêlan pêk tê û têde çend lêkolîn ji aliyê lêkoler û berpirsên hikûmetê û kesatiyên navdewletî di derbarê tundûtîjî, tundrewî û çawaniya çareserkirina wê de tên pêşkêşkirin.



Nûnerê Wezareta Derve ya Holendayê yê bo karûbarên rûbirûbûna tundrewiyê li Iraq, Urdin û Lubnanê, John Vander Zendî berî destpêkirina konferansê di daxuyaniyekê de ji Rûdawê re ragihand: “Rast e li Kurdistanê ew hejmara mezin a xelkê nîne ku diçin nav rêxistina terorîstî, lê belê pêwîst e em realist bin jî, ku di nava kurdan de jî hevşêweyê weke mînak almaniyan, xelkê Kurd bi taybet xort diçin nav rêxistinên tundrew.”



Sefîn Dizeyî: Ezmûna Kurdistanê ya derbarê miyanrewiyê de bi asanî bi dest neketiye






Berdevkê Hikûmeta Herêma Kurdistanê, Sefîn Dizeyî di destpêka konferansê de ragihand: “Dem giring e jibo rûbirûbûna tundrewiyê…, ev konferans ji bo cîhanê û navçeyê jî pêwîst e, ku hevdem e bi derbasbûna 11 salan bi ser kempîna rûbirûbûna tundrewiyê li Herêma Kurdistanê re.”



Dizeyî herwiha dibêje: “Ya ku di ezmûna Kurdistanê de di derbarê miyanrewiyê de bi dest hatiye, bi asanî nebûye, belku bi plan bûye û bûye sedema wê rewşa ku niha heye.”



Di beşeke din a gotara xwe de Dizeyî ragihand: “Kurdistaniyan bi dirêjiya dîrokê bûne qurbaniyê destê tundrewiyê, lewma niha bûne kesên miyanrew. Ev herêm cihê lixwegirtina hemû wan kesan e ku xwediyê nerîn û hizrên ciyawaz in. Zêdetir ji milyonek û 800 hezar penaber û aware berê xwe dane Herêma Kurdistanê, ew jî vê nîşan dide ku Kurdistan bîr û baweriyên ciyawaz li xwe digire.”



Berdevkê Hikûmeta Herêma Kurdistanê herwiha dibêje: “Tundrewî yek ji mezintirîn metirsiyên cîhanê ye, îro teror di jêr navê ola îslamê tên encamdan, lê cihê kêfweşiyê ye, ku Netewên Yekgirtî ragihandiye, nabe teror bi ti ol û grûpekê ve were girêdan.., li Herêma Kurdistanê mamostayên olî dikarin hemahengiyê ligel aliyan bikin û hewlên xwe zêde bikin jibo rûbirûbûna bîr û baweriyên tundrewiyê.”



Kerîm Şingalî: Serkevtina me bi ser terorê vedigere bo xweragiriya civaka Kurdistanê








Wezîrê Navxwe yê Hikûmeta Herêma Kurdistanê jî di konferansa Aştî Bi Rêya Miyanrewiyê de gotarek xwend û têde ragihand: “Teror bûye diyardeyekî cîhanî û gefeke ciddî li ser demokrasî, mafên mirov, aştî, asayiş, seqamgîrî û hemû nirxên me û gelên azad.”



Derbarê bi armanckirina Herêma Kurdistanê ji aliyê terorîstan ve, Kerîm Şingalî got: “Piştî proseya rizgarkirina Iraqê di sala 2003ê de, Herêma Kurdistanê careke din ji grûpên tundrew û terorîst re bû armanceke rastetast. Li gel alozbûna rewşa Iraqê, armanca terorîstan têkdana rewşa Kurdistanê bû, jibo ku Kurdistanê bikin jîngeheke guncaw bo çêkirina bingeha terorê û şaneyên terorîstî, lê belê bi keyfxweşî ve civaka Kurdistanê xweragir bû û bi hemû şêweyekê tundûtîjî û hizra terorê red kir.”



Di beşeke din a gotara xwe de, Şingalî da xuyakirin: “Serkevtina me li hember terorê ji xweragiriya civaka Kurdistanê tê, bi rêya hemahengî û hevkariyeke bihêz di navbera hevwelatiyan û dezgehên Asayişê û hêzên navxwe, hevdem siyaset û bernameya erênî ya hikûmetê bo pêşvebirina dadperweriyê û mafên mirovan û pêkvejiyana aştiyane.”

Rudaw