Çekdarên ser bi Tirkiyê ve goristana gundê Dar Girê li nahyeya Mabata ya Herêma Efrînê ya Rojavayê Kurdistanê têk dane.

Mafnas û parêzer Hisên Neso ku bi xwe xelkê Efrînê ye, vîdyoyek ji Rûdawê re şandiye û têde derdikeve ku endamên grûpên çekdar çend gorên goristana gundê Dar Girê yê ser bi nahyeya Mabata ve têkdane û kêlên wan goran şikandine.

Li gor heman çavkaniyê, ev bûyer serê sibeha Yekşembê roja 31 Tîrmehê (beriya 3 rojan) çêbûye.

Gundê Dar Girê li Mabata ji sala 2018an ve di bin kontrola grûpa Hemzat de ye ku kesek bi navê Ebû Inad el-Miwalî fermandarê wê grûpê ye.

Ev ne cara yekemîn e ku grûpên çekdar ziyanê digihênin gorên goristanên çend gundan li Efrînê.

Herêma Efrînê ya Rojavayê Kurdistanê ji sala 2018an ve û piştî êrîşeke berfireh a artêşa Tirkiyê û komên çekdar ên Sûrî yên ser bi Tirkiyê ve, di bin dagirkeriya Tirkiyê de ye û hêzên Tirkiyê û komên çekdar kontrola herêmê dikin.