Serokkomarê Tirkiyê Recep Tayyip Erdogan di civîna koma partiya xwe de behsa êrîşeke nû ya Tirkiyê bo ser Rojavayê Kurdistanê kir û ragihand, Em derbasî qonaxeke nû ya biryara xwe ya avakirina herêmeke ewle ya bi kûrahiya 30 kîlometreyan dibin. Em dê Til Rifet û Minbicê ji terorîstan paqij bikin.”

Erdogan ji ber alîkariyên bo Partiya Karkerên Kurdistanê (PKK) rexneyên tund li hejmarek welatên Ewropayê girt û got, “Ew dewleta bê beramber çek û pêdiviyên leşkerî dide rêxistina terorê û ne amade ye bifiroşe Tirkiyê, ne dewleta hiqûqê lê navê dewleta terorê heq dikin.”

Serokkomarê Tirkiyê navê  welatên wek Swêd, Finland, Almanya, Fransa û Holanda anî û ew welat bi wê yekê tohmetbar kirin ku “alîkariya terorê” dikin û got, welatên ku dixwazin bibin endamê NATOyê bêyî îzna Tirkiyê nikarin bibin endam.

Recep Tayyip Erdogan got, “NATO rêxistineke ewlehiyê ye, NATO ne rêxistineke alîkariya bo terorîstan e. Li wan welatan; Swêd, Finlanda, Almanya, Fransa û Holanda, polîs wan diparêze. Ew jî bi posterên serdsteyê rêxistina terorîstî xwepêşandana xwe dikin. Li pêşiya Dadgeha Mafên Mirovan a Ewropayê çadiran vedidin û pere kom dikin. Baş e tevî hemû wan tiştan em çawa divê bêjin kerem bikin werin bibin endam…bêyî îzna Tirkiyê ew welatana nikarin bibin endamê NATO. Pêştir me sedema dijatiya xwe bi mînak û belge nîşan daye.”

 

 

Rudaw