Serokê Herêma Kurdistanê Nêçîrvan Barzanî îro li ser rewşa lêqewimî û ziyanmendên lehiya Hewlêrê û hinek navçeyên wê, li gel Parêzgarê Hewlêrê Omêd Xoşnav peywendiyeke telefonî pêk anî û tekez kir ku wî aliyên peywendîdar raspardine ku alîkariya mexdûrên lehiyê bikin û pêdawîstiyên wan dabîn bikin.

Serokê Herêma Kurdistanê Nêçîrvan Barzanî di peywendiya telefonî de rewşa mexdûrên lehiyê ji Parêzgarê Hewlêrê Omêd Xoşnav pirs kir û behsa çawaniya serederiya aliyên hikûmî li gel rewşê û alîkariya lêqewimiyan, kir.

Li gor daxuyaniya Serokatiya Herêma Kurdistanê, Nêçîrvan Barzanî “dûpat kir ku Serokatiya Herêma Kurdistanê ji nêzîk ve pêdaçûnê bo cihên ziyandîtî yên lehiyê dike û aliyên peywendîdar raspardine bo alîkarî û hevkariya lêqewimiyan û dabînkirina pêdawîstiyan” û herwiha ragihand, “xweşbextane” ti ziyaneke canî ya lehiyê nebûye.

Li gor daxuyaniyê, Parêzgarê Hewlêrê Omêd Xoşnaw jî jibilî pêşkêşkirina puxteyek li ser cih û qebareya ziyanan û rewşê bi giştî, spasiya Serokê Herêma Kurdistanê kir ji bo pirsîn û pêdaçûna rewşa lêqewimiyan û ziyanmendan û amadebûna bo alîkarî û hevkariyan.

Roja 30/10/2021, piştî baranake zêde, li navend û çend navçeyên Hewlêrê lehiyeke mezin rabû û ziyaneke zêde ya maddî li pey xwe hişt. Bajarokê Zêrîn, Mela Omer, gundê Korî û bajarokê Korê li Pîrmamê, hinek ji wan cihan in ku zêdetirîn ziyan bi ber wan ketiye.

 

Rudaw