Îsal jinên Siûdiyê di parastina ewlehiya heciyan de beşdariyê dikin. Ev jin li nivîsîngehên Navenda Niştîmanî ya Operasyonên Ewlekariyê peywendiyên telefonî werdigirin û girîngiyê didin silametiya nimêjker û heciyan.

Nuha Xamidî yek ji wan jinan û endama hêzên ewlekariyê dibêje, “Ez şanaziyê bi karê xwe dikim, û malabata min jî şanaziyê bi karê min li sektora ewlekariyê dike, ev yek di peywendiyên telefonî de diyar dibe, ku welatî û akincî tê de pêzanîn û rêzgirtina xwe tînin ziman.”

Pirsa beşdarîkirina jina Siûdî bo parastina ewlekariya haciyan, yek ji çaksaziyên ku Cênişînê Siûdî Mihemed Bin Selamn bi xwe pêrabûye.

Rîham Ebdellah jineke din a heman hêzê “Derbarê qebûlkirina zilamê ewlekariyê bo jinê di warê ewlekariyê de, min ti pirisgirêk nedîtiye, em ligel hevdû kar dikin, zilam bo me alîkar û piştîvanin.”

Îsal, jiber Coronayê dê tenê 60 hezar misilman di ferza hecê de beşdar bibin, ku hemû jî welatiyên Siûdiyê bi xwe ne.

Ev sala duyem e ku jiber pandemiya Covid-19, Siûdiye rê nade misilmanên derve bo pêkanîna ferza hecê serdana wî welatî bikin, ev di demekê de ku ji bo parastina heciyan hemû amadekarî û rêkarên dijî Coronayê hatine kirin û wergirtin.

 

Rudaw