Wezareta Pêşmerge ya Hikûmeta Herêma Kurdistanê biryar da, ku rêya navbera Herêma Kurdistanê û Şingalê veke.

Serpireştê Mêhwera Rojavayê Dîcle ya Hêza Pêşmerge, Babekir Zêbarî di daxuyaniyekê de ji Rûdawê re ragihand, Wezareta Pêşmerge biryar daye ku rêya navbera bajarê Duhokê û navçeya Şingalê were vekirin.

Babekir Zêbarî ku pêştir Serfermandarê Artêşa Iraqê got, di wan du rojan de ew dê li nêzîkî bajarokê Zumarê çeperan vekin û bi fermî rêya Şingalê ji bo hatinûçûna welatiyan were vekirin.

Derbarê helwesta hikûmeta Iraqê de jî, Babekir Zêbarî diyar kir: “Em heta niha nizanin helwesta hêzên iraqî dê çawan be, lê belê em weke xwe, em dê vê rêyê vekin.”

Ji ber êrişên çekdarên Heşda Şeibî û hêzên artêşa Iraqê bo ser Kerkûk, Xurmato û navçeyên din ên Kurdistanî yên li derveyî sînorê îdarî yê Hikûmeta Herêma Kurdistanê, ku di 16ê Cotmeha 2017ê de êrişî Başûrê Kurdistanê kirin, rêyên Kerkûk, Mexmûr, Mûsil, Şingal û beşek ji navçeyên din ên Kurdistanî yên li derveyî îdareya Herêma Kurdistanê ber bi bajarên Herêma Kurdistanê ve hatibûn daxistin.

Serokwezîrê Hikûmeta Herêma Kurdistanê Nêçîrvan Barzanî roja sêşemiya bihorî 05-12-2017ê piştî civîna Encumena Wezîran li Hewlêrê, di konfranseke rojnamevanî de gotibû: “Heta niha daxistina wan rêyan mijareke ewlekariyê bûye. Niha em dikarin hizir ji vekirina vekin û tekez dê ew rê werin vekirin. Çi li Mexmûrê, çi li gel Mûsilê yan li gel Kerkûkê. Em dê pêdeçûnê bi biryarê bikin.”

Rudaw