Qaymiqamê Xurmatû ragihand, ku aliyên nakok ên Xurmatû ji bo bêdengkirina çekan rêkeftine.

Qaymiqamê navçeya Kerkûkê Şelal Ebdul ji Rûdawê re ragihand: “Şeva derbasbûyî heta danê sibê bi telefon me danûstandin li gel hêza Bedir, çekdarên Esaîbî Ehlî Heq û hêza Şehîd Sedir kir. Di encamê de em gihiştine wê biryarê ku teqekirin were sekinandin.”

Ebdul da zanîn, ku niha rewşa navçeyê aram e û got: “Şeva derbasbûyî ji ber aloziyan cadeya sereke ya bajêr hatibû girtin lê niha hatin û çûn asayî bûye.”

Piştî giştpirsiya serxwebûna Başûrê Kurdistanê, di serî de Kerkûk û Xurmatûyê, li nêzîkî sînorê navçeyên nakok ên derveyî îdareya Herêma Kurdistanê hêzên Iraqê ketin nava liv û tevgerê. Ev yek bû sedema ku hêzên pêşmerge bikevin amadebaşiyê.

Herwiha li Xurmatû çekdarên Heşda Şeibî teqe li hemwelatiyan kirin û bi zora çek xwestin kurdan ji malên wan derbixin.

Hikûmeta Herêma Kurdistanê û Fermandariya Giştî ya Hêzên Pêşmerge derbarê vê yekê de hişyarî dan û banga aramkirina rewşê kirin.

Navçeya Xurmatû ser bi parêzgeha Selahadînê ye û 100 kîlometre ji navenda parêzgehê dûr e.

Hejmara şêniya navçeyê bi tevê gundên wê 220 hezar kes in, kurd %55, ereb %15% û tirkmen jî %30ê şêniya navçeyê pêktînin.

Rudaw