Beşek ji siyasetvan û çavdêrên Amerîkî bizavan dikin bi riya navend û dezgehên lêkolînên siyasî li Washingtonê peyaman ji hikûmeta welatê xwe re bişînin, ji bo roleke erênîtir bilîze di warê serxwebûna Herêma Kurdistanê de û rê nede welatên din, ku di Iraqê de berjewendî û ecindeyên xwe bicî bikin.

Balyozê berê yê Amerîka li Iraqê Stîwart Coniz, ji Kurdistan24ê re ragihand: "Amerîka dixwaze di navbera Hewlêr û Bexdayê de rola navberkar bilîze daku diyalog destpê bike û niha divê Amerîka rewşekê dirust bike ku ji bo diyalogê gunca be."

Ji aliyê xwe ve dîplomatkarê berê yê Amerîkî David Mak dibêje: "Amerîka hevsoz e bi pirsa Kurdî re li navçeyê û di gellek waran de Amerîka û Kurdistan hevrêziyeke baş dikin, bi taybet di warê siyasî û serbazî de, lewra divê Amerîka li ser wê hevrêziyê berdewam be, ji ber wê yekê jî divê Amerîka mikur bê ku Kurdistan gellek pêşketin di hemû waran de kiriye."

K24