Wezareta Berevaniya Amerîkayê (Pentagon) derbarê civîna Wezîrê Berevaniya Amerîkayê James Mattis û Serokê Herêma Kurdistanê Mesûd Barzanî de daxuyaniyek belav kir û di daxuyaniyê de behsa daxwazeke weke paşixtina giştpirsiyê nehatiye kirin.

Berdevkê Pentagonê dibêje: “roja 22-08-2017, Wezîrê Berevaniyê James Mattis li gel Serok Mesûd Barzanî civiyan. Di civînê de Matti ji ber pêşengiya bi hêz a pêşmerge, ku bûye hevbeşekî giring di şerê DAIŞê de, spasî kir.”

Berdevkê Pentagonê dibêje: “Wezîr Mattis ji ber serkeftina operasyona Mûsilê pîrozbahî li Serok Barzanî kir û ragihand, ku azadkirina bajêr di encama hemahengiya bihêz a Bexda û Hewlêre pêk hatiye.”

Pentagon dibêje, di hevdîtinê de Wezîrê Berevaniya Amerîkayê daxwaza berdewambûna guftûgûyên di navbera Hewlêr û Bexdayê de ji Serok Barzanî kiriye.

Derbarê hevdîtina Barzanî û Mattis de Serokatiya Herêma Kurdistanê jî ragihandibû ku Wezîrê Berevaniya Amerîkayê behsa helwesta welatê xwe ya li hember sazdana giştpirsiyê kir û ragihand, ku giştpirsî ji pêşbîniyên wan dûr bûn.

Li hember vê yekê, Serok Barzanî jî ji Mattis re gotiye: “Referandum ne mijareke şexsî ye û mafê gel e û li gel ti prensîpên mafên mirov û demokrasiyê nakok nîne. Bi ti şêweyekê pirsgirêkê bo şerê terorê çê nake.”

Rudaw