Serokê berî yê Ajansa Navendî ya Saloxgeriyê ya Amerîkayê (CIA) David Petraeus got: “Dibe mafê kurdan hebe bibin xwedan dewleteke serxwebixwe. Lê di vê demê de serxwebûn ne hêsan e.”



David Petraeus di hevpeyvînekê de ji medya Awûstralyayê re ragihand, hikûmeta Herêma Kurdistanê biryar daye referandûma serxwebûnê encamp bide. Lê zehmet e ku bikarin serbixwe bin.



Serokê berî yê CIAyê amaje bi wê yekê kir, ku di dema serokatiya wî de CIAyê nirxandinek kiriye û gihiştine wê nêrînê ku ji bo bikare dewleta xwe ser lingan bigre û birêve bide, pêwîste hikûmeta Herêma Kurdistanê rojane 800 hezar bermîl petrolê bişîne derve û herwiha her nirxê bermîlekî jî herî kêm 105 dolaran be.



Petraeus dibêje: “Niha hikûmeta Herêma Kurdistanê di rojên bê pirsgirêk de rojane 800 hezar bermîl petrolê berhemtîne. Beşek ji vê petrolê hindarde dike û nirxê her bermîlekê di navbera 40 û 50 dolaran de ye. Lewma jî pêwîstiya Kurdistanê heye da ku alîkariyê ji Bexdayê werbigre.”



Bi nêrîna David Petraeus, di rewşa serxwebûnê de divê hikûmeta Herêma Kurdistanê hewl bide ligel Bexda û Enqerê bigihe rêkeftineke baş da ku bi awayeke aştiyane ligel Iraqê cihê bibe.



Serokê berî yê CIAyê Petraeus, di navbera salên 2007 û 2008ê de Fermandarê Hêzên Hevpeymanan a li Iraqê bû. Petraeus di 2008 û 2010ê de Fermandarê Fermandeya Navendî ya Artêşa Amerîkayê bû. Generalê amerîkî di navbera Îlona 2011 û Kanûna 2012ê de serokatiya CIAyê kir.

Rudaw