Endamek rêveberiya PDKê amaje bi vê yekê dike ku PDK li gel çalak kirina parlamentoya Kurdistanê ye û di vê derbarê de gelek hewl daye, lê tişta ku mayî dikeve ser YNKê û Tevgera Gorran.

Endamê rêveberiya PDKê Nûrî Heme Elî ji BasNewsê re ragehand: ‘’Gelek hewldan hene bo çalak kirina parlamentoyê û em li bendê ne ku ka dê çi bê kirin, PDK li gel çalak kirina parlamentoyê ye, lê top naha di himbêz Gorran û YNKê de ye, heval û birayên YNKê, li gel Gorran axaftine ku parlamento bê çalak kirin, lê birayên Gorran wek pêwîst gav neavêtine û li ser nêrîna xwe rijd in, lê webalê çalak kirina parlamentoyê dikeve ser Tevgera Gorran.’’

Herwaha amaje bi vê yekê jî kir: ‘’Hêvîdarim Gorran bi nermî tevbigere, Newşîrwan Mistefa hatiye û hêvîdarim tenduristiya wî baş be, li ser karên baş bifikire û xêr ji kurdan re bike, dawî li vê bêzarî û nîgeraniya xelkê bîne, parlamento çalak bibe û em hemû bikarin vê qonaxê ber bi pêşve bibin.’’

Wî rêveberê PDKê derbarê helbijardeya nû ya çalak kirina parlamentoyê de jî ji BasNewsê re got: ‘’Eger YNK bête ser xetê, xelkê din jî heye û eger Yekgirtû jî bê, wê demê pirsgirêk namîne bo çalak kirina parlamentoyê û pir rihet dibe, bila Gorran opozîsyon be, ji ber vê em û YNK piranî ne li parlamentoyê, ew 11 parlamenterên din li gel vê yekêne. Partiya Sosyalîst û Komîst û Tevgera Îslamî û aliyên sêyem li gel çalak kirina parlamentoyê ne. Ca eger em karûbarên referandomê ranawestînin û ev pirseke netewî ye û daxwaza gelê Kurdistanê ye, li gor min hemû xelkê Kurdistanê jî li gel referandomê ne, divê em vê yekê bikin.’’

Basnews