Serokê encumena Şingalê Weysî Nayîf li ser serdana şandeka êzîdî bo Îranê axivî û got, em qebûl nakin ji derveyî îradeya encumena Şingalê û rêveberiya bajêr ti şand û kesek bi navê êzîdiyan serdana welatên biyanî bike. Jixwe ew şanda ku çûye Îranê jî nûnertiya êzîdîyan nake.
Li gorî serokê encumena Şingalê, ew êzîdîyên ku tevlî Heşda Şebî û Hêza Parastina Şingalê (girêdayî PKKê) bûne, nûnertiya êzîdîyan nakin.
Weysî Nayîf gazî Îranê kir ku piştevaniya hêzên ne qanûnî û ne fermî li Şingalê neke û got, dema DAIŞê êrişî Şingalê kir Îran li ku bû? Çima nehatin alîkariya xelkê Şingalê bikin? Xelkê Şingalê zêdetirî salekê bê nan û av bû, wê çaxê Îran li ku bû?