Hate gotin ku du ciwanên ji Hewlêrê di rêya Bulgarîstanê de ji ber sermayê qerisîn û jiyana xwe ji dest dane.

Ciwanên bi navê Telet Ebdulhemîdê 36 salî û Herdî Xefûrê 29 salî, li Bûlgarîstanê di rêya koçberiyê de ji sermayê qerisîn.

Birayê Telet Ebdulhemîd, Samed Ebdulhemîd ji Bûlgarîstanê ji Rûdawê re ragihand; “Telet û Herdî roja 14ê Kanûna 2016ê ji Başûrê Kurdistanê derketin û çûne Tirkiyê. Piştî 4 rojan, roja 18ê Kanûnê ji Tirkiyê ve derbasî Bûlgarîstanê bûn. 21ê Kanûnê gihiştine Bûlgarîstanê. Lê di dema rêwîtiyê de 48 demjimêran di nav berfê de bê xwarin û vexwarin mane. Dema gihiştine Bûlgarîstanê Herdî jiyana xwe ji dest daye.”

Li gorî gotina Samed Ebdulhemîd, birayê wî Telet termê hevalê xwe Herdî bi cîh nehiştiye û bi wî re mijûl bûye, lewma Telet jî jiyana xwe ji dest daye. Tetmê herdu ciwanan rakirine nexweşxaneya bajarê Borgasê.

Hevjîna Telet xwîşka Herdî ye û Telet bavê 7 zarokan e û herwiha pêşmerge bûye.

Li gorî gotina birayê Herdî, Hikûmeta Herêma Kurdistanê ji bo veguhestina termê herdu ciwanan karasanî ji bo wan kiriye.

Berpirsê Beşa Penaberan û Rewenda Kurdî li Rêveberiya Koç û Koçberan a Hewlêrê Nezhet Husên ji Rûdawê re ragihand, agahiya derbarê herdu ciwanan de gihiştiye destê wan û niha pêdeçûnê dikin.

Rudaw