Serokwezîrê Tirkiyeyê Bînalî Yildirim di çarçoveya serdanekê de îro gihêşt Bexdayê û ji aliyê şandeke Wezareta Derve ya Iraqê ve hate pêşwazîkirin.

Di vê serdanê de Wezîrên Berevanî, Perwerdehî, Enerjî, Aborî û Gûmrikê bi Bînalî Yildirîmî re ne, biryar e jî piştre jî serdana Hewlêrê paytexta Herêma Kurdistanê bike.

Serokwezîrê Tirkiyeyê dê li Bexdayê digel Serokomarê Iraqê Fûad Masûm, Serokê Parlementoyê Selîm Cibûrî û hin ji berpirsên siyasî û olî û nûnerên Tirkmenan bicive. Ti amaje nehate kirin ku ligel Serokwezîrê Iraqê Heyder Ebadî bicive.

Piştre jî serdana Herêma Kurdistanê Hewlêrê bike.

Dê li Hewlêrê jî digel Serokê Kurdistanê Mesûd Barzanî û Serokwezîrê Herêma Kurdistanê Neçîrvan Barzanî re hevdîtinan pêk bîne.

Aloziya pêwendiyên di navbera Enqere û Bexdayê û asayîkirina pêwendiyan, çend pirsên din wek petrol û gaz, şerê li dijî DAIŞê û hebûna PKKê li Şingalê pirsên sereke yên civînên Yildirim û berpirsên Iraqî ne.

Serdana Serokwezîrê Tirkiyê Binalî Yidirim bo Iraqê, piştî pêwendiyeke telefonî di navbera Serokomarê Tirkiyê Recep Teyip Erdogan û Serowezîrê Iraqê Heyder Ebadê de hat, hat ragihandin jî ku herdu aliyan li ser asayîkirina pêwendiyan lihev kirine û Erdogan piştevaniya xwe ji Iraqê û şerê li dijî DAIŞê û yekperçeyiya xaka Iraqê û serweriya wê ragihandiye.

K24