Yekgirtû bo PKK û PDKê: Em şerê kurd-kurd red dikin
Endamê Encumena Cîbicîkirinê ya Yekgirtûya îslamiya Kurdistanê, Xelîl Îbrahîm di daxuyaniyekê de ji Rûdawê re ragihand: “Em li gel çareserkirina arîşeyên navbera PDKê û PKKê bi rêyên gotûbêj û danûstandinê ne.”
Xelîl Îbrahîm got: “Em hemû çareseriyên serbazî li Şingalê û her devereke din a Kurdistanê red dikin. Nakokiya Kurdî-Kurdî zirareke mezin digihîne gelê me û ti aliyek di wan nakokiyan de serkevtî nîne.”
Îbrahîm destnîşan kir: “Beşdariya hêzên kurdistanî di şerê terorê û bergirî li millet, cihê pêzanîn û rêzgirtinê ye, lê belê em li gel rêzgirtina li hember taybetmendiya her parçeyeke Kurdistanê û nedestwerdana di karûbarên navxweyê hev de ne. Çimu xwedê nexwastî, her bûyereke nexwastî li Şingalê, bandorê li ser cihên din dike û arîşeyan kûrtir dike.”
Ev serkirdeyê Yekgirtûya Îslamiya Kurdistanê ku nûnerê partiyên îslamiyên Başûrê Kurdistanê di komîteya bilind a amadekariyên ji bo Kongreya Netewî de ye jî, di berdewamiya axavtina xwe de ragihand: “Pêwîst e birayên PKKê û PDKê arîşeyên xwe bi gotûbêjan çareser bikin. Bi zûtirîn dem jî pêngavan bavêjin ji bo sazkirina Kongreya Netewî û diyarkirina stratejîk û asayişa netewyî ya Kurd li hemû parçeyên Kurdistanê.”
Li ser hebûn û mana hêzên PKKê li Şingalê, arîşe di navbera PDKê û PKKê de derketiye. PKK piştî êrişa DAIŞê bo ser Şingalê û bûyerên piştre, hêzên xwe li Çiyayê Şingalê bicih kir û herwiha çend hêzên din ên ser bi xwe ve li deverê pêk anî.
Hikûmeta Herêma Kurdistanê, Wezareta Pêşmerge û Partiya Demorkata Kurdistanê çendîn caran bi fermî daxwaz ji PKKê kirine, ku bi gotûbêj û rêyên aştiyane hêzên xwe ji Şingalê derxîne, lê belê PKK wê yekê red dike û amade nîne ku hêzên xwe ji Şingalê bibe derê.
Ji aliyekê din ve, Amerîkayê jî bi fermî ragihandiye, ku PKK hêzeke terorîstî ye û divê Şingalê vala bike.
Washingtonê daye xuyakirin, ku ti cihê PKKê li Şingalê nîne û PKK li pêşiya avedankirin û vegera xelkê Şingalê bûye astengiyek mezin.
Rudaw
