Îro li Parlamentoya Ewropayê xelata Sakharov pêşkêşî her du keçên Kurdên Êzidî Nadiye Murad û Lemiya Beşar dike, ew jî piştî ku di meha bihorî de ew her du keç weke wergirê xelatê hatibûn diyarkirin.

Nûnerê Hikûmeta Herêma Kurdistanê li Yekîtiya Ewropayê Dilawer Ajgeyî di vê bareyê de ji Rûdawê re ragihand, ev xelat nîşaneya hevxemî û hevsengeriya gelên Yekîtiya Ewropayê li gel gelê Kurd û bi taybet jî Kurdên Êzidî ye.

Meha derbasbûyî, Yekîtiya Ewropayê her yek ji Nadiye Murad û Lemiya Beşar weke wergirê xelata salane ya Yekîtiya Ewropayê bo azadiyê nêrînê (Sakharov) destnîşan kir.

Biryar e îro sêşemî 13ê Kanûna 2016ê, di merasîmekê taybet de li baregeha Parlamentoya Ewropayê li Strasburgê, Serokê Parlamentoya Ewroapyê Marten Schultz bi amadebûna 750 parlamenterên ewropî, wê xelatê pêşkêşî wan her du keçên Kurdên Êzidî bike.

Nûnerê Hikûmeta Herêma Kurdistanê li Yekîtiya Ewropayê ragihand, weke Nûneratiya Hikûmeta Herêma Kurdistanê bi fermî bo vê civînê hatine bangkirin.

Dilawer Ajgeyî herwiha tekez kir: “Her yek ji Mîr Dasin Farûq Beg nûnerê malbata Mîrê Kurdên Êzidî, Mîr Tehsîn Beg, Rêvebirê Giştî yê Karûbarên Êzidiyan li Wezareta Ewqaf û Karûbarên Olî ya Hikûmeta Herêma Kurdistanê Xeyrî Bozanî û Nûnerê Bingela Laliş li Almanyayê beşdarî wê merasîmê dibin.”

Ajgeyî amaje bi giringiya xelata Sakharov kir û ragihand, ew xelat nîşaneya hevxemî û hevsengeriya gelên Yekîtiya Ewropayê li gel Kurd û bi taybet jî Kurdên Êzidî li hember wan tawanan e, ku DAIŞê encam dane.

Nûnerê Hikûmeta Herêma Kurdistanê diyar kir: “Hikûmeta Herêma Kurdistanê û Serokwezîrê Herêma Kurdistanê rêzdar Nêçîrvan Barzanî bi xwe li Parlamentoya Ewropayê bi awayekê berdewam di hewldanê de bûn ji bo destnîşankirina Nadiye Murad û Lemîhe Beşar bo bi dest xistina wê xelata mezin.”

Ajgeyî bi dest xistina xelata Sakharov, weke destkevteke mezin a dêplomasî û lobiya kurd li Ewropayê da zanîn.

Rudaw