Berpirsê Gorranê: Hikmê Sedam ji hikmê Kurdistanê baştir bû!
Mamostayên nerazî duh sêşemî 15ê Mijdarê li bajarê Silêmaniyê li pêşberî Perwerdeya Silêmaniyê xwepêşandaneke nerazîbûnê li dar xistin.
Berpirsê pilebilind ê Tevgera Gorranê, Hakim Şêx Letîf jî di xwepêşandanê de amade bû û axavtinek kir.
Hakim Şêx Letîf nerazîbûna xwe li hember biryara paşekewtkirina mûçeyan ji aliyê Hikûmeta Herêma Kurdistanê ve anî ziman û ragihand: “Sîstema paşekewtkirina mûçeyan ji aliyê Hikûmeta Herêma Kurdistanê ve biryareke ne yasayî ye û divê hikûmet vê biryarê hilweşîne.”
Şêx Letîf herwiha behsa dema desthilatdariya rejîma Beis û Serokê berê yê Iraqê Sedam Hisên jî kir û ew desthilatdarî û Hikûmeta Herêma Kurdistanê dan ber hev û got, ku hikûmeta Sedam baştir ji Hikûmeta Herêma Kurdistanê bû.
Şêx Letîf wiha axivî:
“Caran me digot, Sedam û hikûmeta wî dijminên me ne û nebaş in, lê belê vê hikûmetê (Hikûmeta Herêma Kurdistanê), ji wan nebaştir bû. Sedam 33 sal desthilatdarî kir û şerê welatan kir, lê belê mûçeyên fermanberan qut nekir.”
Wî berpirsê Gorranê di beşeke din a gotara xwe de bang li fermanberên Herêma Kurdistanê kir û got: “Ez daxwaz li hemû fermanberên Herêma Kurdistanê dikim, ku giliyek yasayî li dijî Hikûmeta Herêma Kurdistanê tomar bikin.”
Hakim Şêx Letîf ji xwepêşanderan re tekez kir: “Her tiştek ku ji destê min were, ez dê bo we bikim û ez dê piştevanê we bim. Ez dê hemû demî bi we re bim û ez teqes bawer im ku giliyên we dê hikûmetê neçar bike ku biryara xwe ya paşekewtkirina mûçeyan li ber çavan re derbas bike.”
Heyama mehek û nîv e, ku xwandingehên li her du parêzgehên Hewlêr û Duhokê vebûna û proseya xwandinê dest pê kiriye, lê belê mamostayên her du parêzgehên Silêmanî û Helebceyê, ku îdareyên Raperîn û Germiyanê jî li xwe digirin, dest bi boykotê kirine û xwepêşandanan li dar dixin.
Mamostayên nerazî daxwaza dikin, ku rewşa wan were baştirkirin û sîstema paşekewtkirina mûçeyan jî bihê hilweşandin.
Rudaw
